Քոչարյանի ձերբակալությունից մինչև ԵՄ անդամակցություն և ՌԴ-ում ՀՀ դեսպանի փոփոխություն․ ի՞նչ է գրում ռուսական մամուլը

ՀՀ նախկին նախագահ Ռոբերտ Քոչարյանը և նրա որդին` Սեդրակ Քոչարյանը, ձերբակալել են կոռուպցիայի գործով: Պետության նախկին ղեկավարը մեղադրվում է պաշտոնեական դիրքի չարաշահման, կաշառակերության և խոշոր չափերի փողերի լվացման համար։ Известия-ի հետ զրուցած փորձագետները գործը կապում են ռուսամետ ընդդիմության վրա ճնշումների հետ՝ Երևանի` Բաքվի, Անկարայի և Արևմուտքի հետ մերձեցման ֆոնին։

Քաղաքագետ Քամրան Հասանովն իրավիճակը կապում է հին քաղաքական էլիտայի դեմ պայքարի հետ։

Հասանովը նշում է, որ դաշտը մաքրվում է՝ կանխելու համար նախկին առաջնորդների, մասնավորապես՝ այսպես կոչված «ղարաբաղյան կլանի» իշխանության վերադարձը, որը ներկայացնում են Քոչարյանը և Սարգսյանը: Նրա կարծիքով՝ իրավիճակը Քոչարյանով չի ավարտվի: Քաղաքական գործիչները, խոշոր գործարարները և այլ ազդեցիկ գործիչներ, որոնք դեմ են եվրաինտեգրմանը, Ռուսաստանի հետ կապերի թուլացմանը և Արցախի հարցում կառավարության ներկայիս գծին, շարունակում են մնալ սպառնալիքի տակ։

BBC-ի ռուսական ծառայությունը նկատել է, որ Քոչարյանը ձերբակալվել է իր որդու՝ Լևոնի և Նիկոլ Փաշինյանի միջև խորհրդարանում տեղի ունեցած վիճաբանությունից մեկ օր անց։ Փաշինյանը մեղադրել է Քոչարյանների ընտանիքին ժողովրդի հաշվին հարստանալու համար և խոստացել կանխել «թալանված միլիոնների» փոխանցումն իրենց ժառանգներին։ Ի պատասխան՝ նախկին նախագահի որդին մեղադրել է վարչապետին ընտրողական արդարադատության մեջ։ 

Ինչպես նշվել է, Փաշինյանը շատ հուզառատ ելույթ է ունեցել, որի ընթացքում վիճաբանել է խորհրդարանի բազմաթիվ անդամների հետ։

Անդրադառնալով ԵՄ-ին անդամակցելու վերաբերյալ նրա հայտարարություններին` գործակալությունը գրել է, որ Մոսկվան ցանկանում է, որ Փաշինյանը ձախողվի ԵՄ անդամակցության հարցում։ Նրանք իսկապես պնդում են, որ հանրաքվեն անցկացվի մինչև տարեվերջ։ Հակառակ դեպքում՝ Հայաստանի անդամակցությունը Եվրասիական տնտեսական միությանը կարող է դե ֆակտո կասեցվել։

Միևնույն ժամանակ՝ Փաշինյանը չի խոստացել հանրաքվեն անցկացնել մինչև տարեվերջ։ Նա նման ժամկետ չի նշել։ Նա ասել է, որ մենք հանրաքվե կանցկացնենք, երբ Եվրամիությունից որևէ արձագանք լինի։

Բացարձակապես հաստատ չէ, որ դա շուտով տեղի կունենա։ Ավելին, հանրաքվեի կազմակերպման գործընթացն ինքնին ժամանակ է պահանջում։ 

Քաղաքագետ Իվան Մեզյուխոն Lenta.ru-ի հետ զրույցում նշել է, որ Ռուսաստանում Հայաստանի դեսպանի փոփոխությունը ոչինչ չի փոխի, քանի դեռ Փաշինյանը չի փոխել իր եվրաինտեգրման քաղաքականությունը Եվրասիական տնտեսական միության (ԵԱՏՄ) երկրների հաշվին։ Նրա խոսքով՝ փորձառու դիվանագետը չի կարողանա լուծել Մոսկվայի և Երևանի միջև երկխոսության դժվարությունները։

Նրա խոսքով՝ Մնացական Սաֆարյանը փորձառու հայ դիվանագետ է՝ երկարատև աշխատանքային փորձով, ով հայտնի չէ հրապարակային հակառուսական հայտարարություններով։ Փաշինյանը, հավանաբար, նրան կհանձնարարի կարգավորել հայ-ռուսական երկխոսությունը, սակայն այս խնդրի կատարումը կախված է ոչ թե դեսպանից, այլ՝ հենց վարչապետից։

Գործող դեսպանը, հավանաբար, հրաժարական է տալիս, քանի որ Փաշինյանը չի կարողանում հասնել իր նպատակներին Ռուսաստանի հետ հարաբերություններում՝ իր բազմավեկտոր քաղաքականության, եվրաինտեգրման ձգտման և Հավաքական անվտանգության պայմանագրի կազմակերպության (ՀԱՊԿ) հետ կապերի խզման ֆոնին։