Լոնդոնում Իսրայելի դեսպանատան հարևանությամբ վաճառքի են հանվել Խամենեիի հետ կապվող շքեղ բնակարանները
Լոնդոնի Քենսինգթոն թաղամասում գտնվող երկու շքեղ բնակարաններ, որոնք կապվում են Իրանի գերագույն առաջնորդ Մոջթաբա Խամենեիի հետ, վաճառքի են հանվել. հայտնում է The Sunday Times-ը։
Բնակարանները գտնվում են Քենսինգթոնյան պալատի հարևանությամբ և Իսրայելի դեսպանատան հարակից փողոցում։ Դրանք դեսպանատան շենքից հեռու են մոտ 45 մետր հեռու և նայում են դրա հետնամասին։
Բնակարաններից մեկը՝ մոտ 366 քառակուսի մետր մակերեսով, զբաղեցնում է շենքի վեցերորդ և յոթերորդ հարկերը։ Այն ունի հինգ ննջասենյակ, սպասարկող անձնակազմի համար նախատեսված առանձին տարածք և մասնավոր տանիքի տեռաս։ 2016 թվականին այն գնվել էր 19 մլն ֆունտով, իսկ այժմ վաճառքի է հանվել գրեթե 12 մլն ֆունտով։ Բնակարանը համատեղ վաճառքի են հանել Knight Frank-ն ու Sotheby’s-ը։
Երկրորդ բնակարանը զբաղեցնում է նույն շենքի յոթերորդ և ութերորդ հարկերը։ Այն 2014 թվականին գնվել էր 16,75 մլն ֆունտով։ Այժմ գույքի նկատմամբ նշանակվել է կառավարիչ, սակայն դրա վաճառքի գինը հրապարակված չէ։ Երկու բնակարանների ձեռքբերման ընդհանուր արժեքը կազմել է մոտ 35,75 մլն ֆունտ։
Բնակարանների պաշտոնական սեփականատերը իրանցի բանկիր և գործարար Ալի Անսարին է։ Միացյալ Նահանգների ֆինանսների նախարարությունը հուլիսին նրան ներառել է պատժամիջոցների ցուցակում՝ անվանելով Իրանի գերագույն առաջնորդ Մոջթաբա Խամենեիի «առանցքային ֆինանսավորողներից» մեկը։ ԱՄՆ իշխանությունները պնդում են, որ Անսարին վերահսկել է Խամենեիին և Իրանի ռեժիմի այլ ներկայացուցիչներին պատկանող ակտիվների լայն ցանց և արտերկրում նրանց անունից գույք է ձեռք բերել։
Անսարին նախկինում նաև պատժամիջոցների է ենթարկվել Մեծ Բրիտանիայի կողմից՝ Իրանի Իսլամական հեղափոխության պահապանների կորպուսի ֆինանսավորմանն աջակցելու կասկածանքով։ Նա հերքում է Մոջթաբա Խամենեիի կամ ԻՀՊԿ-ի հետ որևէ ֆինանսական կապ ունենալու մեղադրանքները։
The Sunday Times-ի տվյալներով՝ բնակարանների վաճառքի թույլտվությունը տրվել է այն ժամանակ, երբ Անսարին չի կատարել հիփոթեքային պարտավորությունները։ Գույքի վարկատուները կառավարիչներ են նշանակել՝ իրենց միջոցները վերադարձնելու նպատակով։ Բնակարանների վաճառքից հնարավոր մնացորդային շահույթը, ըստ հրապարակման, կսառեցվի, քանի դեռ Անսարին շարունակում է մնալ պատժամիջոցների տակ։
Հրապարակման համաձայն՝ բնակարանների նկատմամբ արդեն իսկ հետաքրքրություն կա:
Մոջթաբա Խամենեիի հետ բնակարանների կապի մասին տեղեկություններ են հայտնվել տարբեր հետաքննություններում։ Սակայն բնակարանները պաշտոնապես գրանցված են Ալի Անսարի անունով, ոչ թե Խամենեիի։ Անսարին հերքում է Խամենեիի հետ ֆինանսական կամ անձնական կապ ունենալը։
