Մինչ Իրանի դեմ Թրամփի պատերազմը խաթարում է վառելիքի համաշխարհային շուկաները, ԱՄՆ-ն խթանում է «էներգետիկ առատության» գաղափարը․  France 24

Մինչ Իրանի դեմ ԱՄՆ նախագահ Դոնալդ Թրամփի վարած պատերազմն անկայունացնում է վառելիքի համաշխարհային շուկաները, Հյուսթոնում մեկնարկում են G20-ի հանդիպումները, որոնց ընթացքում Միացյալ Նահանգները խթանում է «էներգետիկ առատության» գաղափարը։ Հանդիպումներին կմասնակցեն խոշորագույն տնտեսություն ունեցող երկրների՝ այդ թվում Չինաստանի, Հնդկաստանի, Ճապոնիայի և Գերմանիայի պատվիրակությունները, ինչպես նաև նավթ արտադրող խոշոր պետություններ՝ Կանադան և Սաուդյան Արաբիան։ Ակնկալվում է նաև Ռուսաստանի մասնակցությունը․ հայտնում է France 24-ը։

Քննարկումները նախատեսված են մինչև սեպտեմբերի 14-ը՝ Հյուսթոնում (Տեխաս նահանգ), որը հայտնի է նավթի հարուստ պաշարներով։

Ռուս դիվանագետները շաբաթ օրը հայտնել են, որ Մոսկվան նույնպես պաշտոնյաներ կուղարկի։

Երկու շաբաթ առաջ կայացած G20-ի նախորդ հանդիպման ժամանակ Ռուսաստանի ֆինանսների նախարար Անտոն Սիլուանովի անսպասելի ներկայությունը մեծ արձագանք էր առաջացրել։ Ուկրաինայի եվրոպացի դաշնակիցները հիասթափություն էին հայտնել Ռուսաստանին հրավիրելու՝ ԱՄՆ որոշման առնչությամբ, քանի որ այն հակասում էր հարևան երկրի դեմ պատերազմի պատճառով Մոսկվային մեկուսացնելու ջանքերին։

Հյուսթոնյան հանդիպումներն անցկացվում են Մերձավոր Արևելքում ընթացող պատերազմի ֆոնին նավթի և գազի գների կտրուկ աճի պայմաններում, երբ Եվրոպան փորձում է լրացնել գազի պահեստարանները՝ նախապատրաստվելով ձմռանը։

Որպես G20-ի հանդիպումները հյուրընկալող կողմ՝ Վաշինգտոնի հայտարարված առաջնահերթություններից մեկը մատչելի, հուսալի և անվտանգ էներգիայի հասանելիության ընդլայնումն է, սակայն մատակարարումները լրջորեն տուժել են փետրվարին ԱՄՆ-ի և Իսրայելի կողմից Իրանի վրա հարձակումից հետո։ Միացյալ Նահանգներում կտրուկ աճել են վառելիքի գները. Ամերիկյան ավտոմոբիլային ասոցիացիայի (AAA) տվյալներով՝ դիզելային վառելիքի մեկ գալոնի (3,78 լիտր) գինը հասել է ռեկորդային մակարդակի և այժմ կազմում է միջինը 6.20 դոլար։

Սովորական բենզինը նույնպես 44 տոկոսով ավելի թանկ է, քան պատերազմից առաջ էր։ Ոչ ժողովրդականություն վայելող պատերազմն ու դրա հետևանքները ստիպում են Թրամփի Հանրապետական կուսակցությանը մտավախություն ունենալ նոյեմբերին կայանալիք միջանկյալ ընտրություններում պարտություն կրելու վերաբերյալ։