«Դա աղետ է»․ Մերցի կուսակցությունը Մեկլենբուրգ-Առաջավոր Պոմերանիայի ընտրությունների արդյունքներով չի անցել տարածաշրջանային խորհրդարան

Գերմանիայի 2 տարածաշրջանում՝ Բեռլինում և Մեկլենբուրգ-Առաջավոր Պոմերանիա երկրամասում ընտրություն է անցկացվել: Թափ առնող ծայրահեղ աջակողմյան «Այլընտրանք Գերմանիայի համար» (AfD) կուսակցությունը գրանցել է ևս մի հաջողություն: Միևնույն ժամանակ՝ կանցլեր Ֆրիդրիխ Մերցի «Քրիստոնեա-դեմոկրատական միությունը» (CDU), ըստ ընտրական հանձնաժողովի, չի կարողացել հաղթահարել Մեկլենբուրգ-Առաջավոր Պոմերանիայի նահանգային խորհրդարանի ընտրություններում տեղեր ապահովելու համար անհրաժեշտ 5% շեմը: CDU-ն երբեք այդքան ցածր արդյունքի չէր հասել ո՛չ նահանգային, ո՛չ էլ դաշնային ընտրություններում․ հայտնում է BBC-ն։

AfD-ն հաղթել է Մեկլենբուրգ-Առաջավոր Պոմերանիայի խորհրդարանի ընտրություններում՝ հավաքելով ձայների մոտ 38.2%-ը՝ գերազանցելով ձախակենտրոն «Սոցիալ-դեմոկրատական կուսակցությանը» (SPD), որը ստացել է 35.5%: Մերցի «Քրիստոնեա-դեմոկրատական միությունը» (ՔԴՄ) ստացել է ձայների ընդամենը 4.9%-ն, ինչը նշանակում է, որ այն ցածր է խորհրդարանում տեղեր ստանալու համար անհրաժեշտ 5% շեմից։

Բեռլինի Ներկայացուցիչների պալատի ընտրություններում արմատական ձախակողմյան Die Linke (Ձախեր) կուսակցությունը հաղթել է ձայների ավելի քան 25%-ով։ ՔԴՄ-ն, որը մինչև վերջերս գլխավորում էր տարածաշրջանային կոալիցիան, երկրորդ տեղում է՝ գրեթե 19%-ով։ AfD-ն երրորդ տեղում է՝ 16%-ով։

Ընտրատեղամասերի փակվելուց անմիջապես հետո ունեցած ելույթում կանցլեր Մերցը խոստովանել է, որ Մեկլենբուրգ-Պոմերանիայում կայացած ընտրությունները ևս մի հարված էին քրիստոնյա դեմոկրատների համար:

«Մենք չենք կարող քաղցրացնել Մեկլենբուրգ-Առաջավոր Պոմերանիայի արդյունքները. դա աղետ է։ Մեր երկրի ինստիտուտների նկատմամբ վստահությունը նվազում է, և այն ակտիվորեն խաթարվում է աջ և ձախ արմատական կուսակցությունների կողմից», – հայտարարել է Գերմանիայի առաջնորդը։

Մերցը պնդել է, որ ինքը պատասխանատվություն է կրում դրա համար։ Սակայն, մերժելով իր հրաժարականի մասին կոչերը՝ ՔԴՄ-ի ձախողումների և իր չափազանց ցածր անձնական վարկանիշի ֆոնին, նա հայտարարել է, որ պատրաստ է երկիրն առաջնորդել նոր փոփոխությունների միջով։ Նա հայտարարել է, որ սովորական կյանքն այլևս տարբերակ չէ։

«Գերմանիան պետք է դառնա նոր սկիզբների երկիր», – հայտարարել է Մերցը։