Մեծ Բրիտանիան խորհուրդ չի տալիս այցելել Ադրբեջանի՝ Հայաստանի հետ սահմանակից շրջաններ «Ֆորմուլա 1»-ի ժամանակ

Իրանի դեմ պատերազմի հետևանքներից մեկը միջազգային սպորտային օրացույցում առաջացած լուրջ խառնաշփոթն է, և «Ֆորմուլա 1»-ը բացառություն չէ։ Այնուամենայնիվ, այս շաբաթ «Ֆորմուլա 1»-ի մրցավազքն անցկացվում է Ադրբեջանում, որը սահմանակից է Իրանին. գրում է AP News-ը։

Բաքվի քաղաքային մրցուղին, որտեղ շաբաթ օրը կանցկացվի մրցավազքը, գտնվում է Ադրբեջանի՝ Իրանի հետ ունեցած հարավային սահմանի ամենամոտ կետից մոտ 170 կմ հեռավորության վրա։ Սա ավելի մոտ է, քան Բահրեյնի և Սաուդյան Արաբիայի մրցուղիները, որտեղ նախատեսված մրցավազքերը չեղարկվել էին ընթացիկ տարում։

Ճամփորդական խորհրդատվությունները որոշիչ դեր են խաղում «Ֆորմուլա 1»-ի որոշումների կայացման գործում։ «Ֆորմուլա 1»-ի գլխամասային գրասենյակը գտնվում է Լոնդոնում, իսկ թիմերի և անձնակազմի մեծ մասը տեղակայված է Մեծ Բրիտանիայում, ինչը նշանակում է, որ բրիտանական ճամփորդական խորհրդատվությունները մեծ ազդեցություն ունեն մրցումների մասնակիցների շրջանում։

Մեծ Բրիտանիան խորհուրդ չի տալիս այցելել Ադրբեջանի՝ Հայաստանի հետ սահմանակից շրջաններ կամ այն տարածքներ, որոնք նախկինում տուժել են զինված հակամարտությունից (հատկապես ականների վտանգի պատճառով), սակայն այդ տարածքները մոտ չեն մայրաքաղաք Բաքվին։

Ադրբեջանը նշում է «Ֆորմուլա-1»-ի իր առաջին մրցավազքի 10-ամյակը, սակայն այս տարվա միջոցառումը փոքր-ինչ տարբերվում է նախորդներից։ Ադրբեջանի «Գրան պրին» անցկացվելու է շաբաթ օրը, քանի որ կիրակի Ադրբեջանում պետական տոն է՝ «Հիշատակի օր»։

Սեպտեմբերի 27-ը 2020 թվականին ԼՂ տարածաշրջանում ռազմական գործողությունների մեկնարկի տարելիցն է։ Ավելի ուշ՝ 2023 թվականին, Ադրբեջանը տարածաշրջանի նկատմամբ լիակատար վերահսկողություն հաստատեց։