Երբ խոսքերը սպառվում են, ստիպված ես լինում խոսել արյամբ. ադրբեջանցի ակտիվիստը փորձել է ինքնասպան լինել Բաքվի դատարանում
Կալանքի տակ գտնվող ադրբեջանցի ակտիվիստ և հետազոտող Բահրուզ Սամադովն Ադրբեջանի գերագույն դատարանում կայացած լսումների ժամանակ սուր առարկայով վնասել է ձեռքը՝ փորձելով ինքնասպան լինել. այս մասին OC Media-ին հաստատել է նրա փաստաբան Զիբեյդա Սադիգովան։
31-ամյա Սամադովը, որը մինչև 2024 թվականին ձերբակալվելը մի քանի տարի հոդվածներ է գրել OC Media-ի համար, 15 տարվա ազատազրկման է դատապարտվել պետական դավաճանության մեղադրանքով, ինչը նա հերքում է։
Ուրբաթ տեղի ունեցած միջադեպը գրանցվել է այն պահին, երբ Գերագույն դատարանը քննում էր Սամադովի վճռաբեկ բողոքը։ Նիստը վարում էր դատավոր Իլքին Աբդուլլաևը։ Լսումների ընթացքում Սամադովի փաստաբան Զիբեյդա Սադիգովան միջնորդություն է ներկայացրել՝ պահանջելով չեղարկել պետական դավաճանության մեղադրանքը։ Դատարանը մերժել է միջնորդությունը։ Դրանից հետո Սամադովը մի քանի այլ միջնորդություն է ներկայացրել, որոնք դատարանը նույնպես մերժել է։
Փաստաբան Զիբեյդա Սադիգովան նշել է, որ երբ Բահրուզ Սամադովը վնասել է ձեռքը, ասել է. «Երբ խոսքերը սպառվում են, ստիպված ես լինում խոսել արյամբ»։
Սադիգովայի խոսքով՝ Սամադովը նաև նշել է, որ իրեն պատժում են վրեժխնդրության նպատակով՝ չնայած իր անմեղությանը, և որ իրեն տեղափոխել են խիստ ռեժիմի գաղութ ու 2 ամսով տեղավորել պատժախցում։ Նա նաև ասել է, որ Ադրբեջանում օրենքը չի գործում։
Սամադովն ադրբեջանցի հետազոտող և ակտիվիստ է, ինչպես նաև Հայաստանի հետ խաղաղության ջատագով։ Ադրբեջանը բազմիցս ձերբակալել է խաղաղության կոչ անող անձանց։
2025 թվականի հունիսին Բաքվի ծանր հանցագործությունների դատարանը Սամադովին մեղավոր է ճանաչել պետական դավաճանության համար և դատապարտել 15 տարվա ազատազրկման։ Հետագայում նրա դատավճիռը հաստատվել է Վերաքննիչ և Գերագույն դատարանների կողմից։ Նրա գործը միջազգային ուշադրության է արժանացել մարդու իրավունքների պաշտպանությամբ զբաղվող և ակադեմիական կազմակերպությունների կողմից, որոնք նրան քաղբանտարկյալ են համարում։
