Հնդկաստանում ԱՄՆ դեսպանը կարող է պետքարտուղար նշանակվել
Հարավային և Կենտրոնական Ասիայի հարցերով ԱՄՆ հատուկ ներկայացուցիչ և Հնդկաստանում ԱՄՆ դեսպան Սերխիո Գորը կարող է նշանակվել վարչակազմի բարձր պաշտոնում, այդ թվում՝ պետքարտուղարի կամ Սպիտակ տան աշխատակազմի ղեկավարի. հաղորդում է The Washington Sun-ը՝ հղում անելով աղբյուրներին։
Ըստ ներքին քննարկումներին քաջատեղյակ 10 անձի՝ Գորը՝ Սպիտակ տան նախկին բարձրաստիճան օգնականը և Թրամփի մերձավոր դաշնակիցը, միջանկյալ ընտրություններից հետո իր համար նշանակալի պաշտոնի բարձրացման հիմքեր է նախապատրաստում։
Ունենալով լայն կապեր և Թրամփի հետ անմիջական շփման հնարավորություն՝ Գորն ավելի ու ավելի մեծ դերակատարում է ստանձնում բարձր մակարդակի հանդիպումներում, ինչը նրան շնորհում է ազդեցություն՝ դուրս գալով իր դեսպանական պաշտոնի շրջանակներից։ Նա դիտարկվում է որպես առանցքային միջնորդ Վաշինգտոնի և Ասիայի մեծ մասի միջև, ինչպես նաև որպես պետքարտուղար Մարկո Ռուբիոյի վստահելի անձ։ Սպիտակ տան նախագահական կադրերի գրասենյակի նախկին ղեկավարը պահպանում է կապերը Թրամփի վարչակազմի տարբեր օղակներում՝ հաշվի առնելով, որ նախկինում առանցքային դեր է խաղացել հազարավոր պաշտոնյաների ստուգման և նշանակման գործընթացներում։
Այժմ Թրամփի շրջապատում Գորի անունը շրջանառվում է որպես վարչակազմում բարձր
պաշտոններ զբաղեցնելու հավանական թեկնածու։
Ներքին քննարկումներին ծանոթ աղբյուրները հայտնում են, որ Գորի անունը հիշատակվել է մի շարք ազդեցիկ պաշտոնների համատեքստում, այդ թվում՝ Սպիտակ տան աշխատակազմի ղեկավարի կամ Մարկո Ռուբիոյին փոխարինելու՝ պետքարտուղարի պաշտոնը ստանձնելու հնարավորության առնչությամբ։
