Մակրոնն առաջարկել է արգելել երեխաներին օգտագործել արհեստական բանականության որոշ մոդելներ
Ֆրանսիայի նախագահ Էմանուել Մակրոնը հայտարարել է անչափահասների համար վտանգ ներկայացնող արհեստական բանականության որոշ մոդելների օգտագործման արգելքի հնարավորության մասին։
Այս մասին Մակրոնն ասել է Les Echos թերթի հետ զրույցում։
«Եթե ԱԲ օգտագործման որոշակի ձևեր ռիսկեր են ստեղծում երեխաների համար, դրանք պետք է արգելվեն»,- ընդգծել է Ֆրանսիայի նախագահը։
Նրա խոսքով՝ մասնագետները պետք է որոշեն, թե ԱԲ-ի հետ փոխազդեցության ո՞ր տեսակներն են վտանգավոր անչափահասների համար։
Ֆրանսիայի առաջնորդն ԱԲ ոլորտում կարգավորման բացակայությունը համեմատել է «Վայրի Արևմուտքի» հետ։ Նա նշել է, որ անհրաժեշտության դեպքում սահմանափակումները կարող են ընդլայնվել՝ ներառելով վնասակար մոդելների լիակատար արգելք։
«Մենք աշխատում ենք կառավարությունների և ընկերությունների հետ՝ նախնական աուդիտի և հավաստագրման սկզբունքն ամրագրող առաջին կանոնադրությունը մշակելու համար»,- հայտարարել է Մակրոնը։
Նախագահի խոսքով՝ նոյեմբերի 10-11-ը Փարիզի խաղաղության ֆորումում կներկայացվի փաստաթուղթ, որը նպատակ ունի կարգավորել երեխաների կողմից ԱԲ օգտագործումը։
Ֆրանսիական իշխանությունները մտադիր են ապահովել նախաձեռնության իրականացումը եվրոպական մակարդակով, ինչպես նաև Միացյալ Նահանգների, Կանադայի և այլ երկրների մասնակցությունը։
Մակրոնը նախկինում նաև աջակցել է անչափահասների կողմից սոցիալական ցանցերի օգտագործման սահմանափակումներին։
