Նեթանյահուն համարում է, որ նոր կառավարության ղեկավարումը պետք է փոխանցվի իր «Լիկուդ» կուսակցությանը
Իսրայելի վարչապետ Բենիամին Նեթանյահուն հայտարարել է ազգային միասնության կառավարություն ստեղծելու անհրաժեշտության մասին, որի ղեկավարումը պետք է փոխանցվի իր «Լիկուդ» կուսակցությանը։
Նեթանյահուն այս հայտարարությունն արել է տեսաուղերձում։
Նա իր դիրքորոշումը հիմնավորել է այն փաստով, որ հոկտեմբերի 27-ին կայացած Քնեսեթի 26-րդ գումարման ընտրություններում «Լիկուդն» ավելի շատ ձայներ է ստացել, քան մյուս կուսակցությունները։
«Ազգային միասնության կառավարությունը հրատապ անհրաժեշտություն է։ Բնականաբար, նման կառավարությունը պետք է ղեկավարի ամենամեծ կուսակցությունը»,- հայտարարել է Նեթանյահուն։
Նա նշել է, որ նոր կառավարությունը պետք է ներառի ազգային ճամբարի բոլոր կուսակցություններին, այդ թվում՝ ուլտրաուղղափառ և սիոնիստական քաղաքական ուժերին։
Իր ելույթում Նեթանյահուն չի անդրադարձել վարչապետի պաշտոնը մեկ այլ քաղաքական առաջնորդի հետ ռոտացիոն կարգով կիսելու հնարավորությանը։
Հիշեցնենք, որ Իսրայելի նախագահ Իսահակ Հերցոգը կառավարություն ձևավորելու մանդատը հանձնել է ընդդիմության և «Յաշար՛» կուսակցության առաջնորդ Գադի Այզենկոտին։
Այզենկոտը կունենա 28 օր կառավարություն ձևավորելու համար։ Անհրաժեշտության դեպքում նա կկարողանա խնդրել ևս 14 օր հավելյալ ժամանակ։
