ԱՄՆ-ն հետաձգում է Իրանին հարվածներ հասցնելը՝ Պարսից ծոցի երկրների խնդրանքով․ Թրամփ
ԱՄՆ նախագահ Դոնալդ Թրամփը հայտարարել է, որ Վաշինգտոնը ձեռնպահ է մնում Իրանի դեմ ավելի կոշտ ռազմական գործողություններ ձեռնարկելուց՝ Մերձավոր Արևելքի մի քանի երկրների խնդրանքով:
Ամերիկացի առաջնորդն այս հայտարարությունն արել է լրագրող Սթիվեն Էյ Սմիթի հետ զրույցում։ Պատասխանելով հարցին, թե ինչու ԱՄՆ-ն մինչ օրս չի ավարտել հակամարտությունն Իրանի հետ՝ Թրամփը հայտարարել է, որ կարող էր դա անել անմիջապես, սակայն նախընտրել է գործել ավելի զուսպ՝ հաշվի առնելով տարածաշրջանային դաշնակիցների դիրքորոշումը:
«Ես կարող էի ավարտել այն անմիջապես։ Այն երկրների խնդրանքով, որոնց ես փորձում եմ պաշտպանել, մենք գնացինք մի փոքր ավելի երկար և մի փոքր ավելի քաղաքակիրթ ճանապարհով։ Սաուդյան Արաբիան ինձ խնդրեց. «Խնդրում եմ, որոշ ժամանակով ամեն ինչ թողեք այնպես, ինչպես կա»», - ասել է նա։
Ըստ ԱՄՆ նախագահի՝ նմանատիպ խնդրանքներ են ներկայացրել նաև Բահրեյնը, Քաթարը, Քուվեյթը և Արաբական Միացյալ Էմիրությունները։
Թրամփն ընդգծել է, որ առանց այս խնդրանքների Վաշինգտոնն ավելի լայնածավալ գործողություններ կձեռնարկեր Իրանի դեմ։
«Մենք արդեն շատ հեռու ենք գնացել։ Հարձակվել ենք նրանց վրա, բայց մեծ մասամբ հանգիստ ենք թողել նրանց կամուրջները։ Մենք ոչնչացրել ենք մեկ խոշոր կամուրջ, քանի որ նրանք շատ վատ էին վարվում, բայց պահպանել ենք նրանց էլեկտրաէներգիայի արտադրության և արտադրական հզորությունները։ Մենք ընդհանրապես չենք հարձակվել նրանց էներգետիկ ոլորտի վրա», - նշել է ամերիկացի առաջնորդը։
Միևնույն ժամանակ՝ Salem News Channel-ի հետ զրույցում Թրամփը հայտարարել է, որ անկասկած կվերսկսի Իրանի դեմ հարվածները, եթե անհրաժեշտ համարի։
«Եթե տեսնեի, որ ամեն ինչ այլ կերպ է ընթանում, կանեի։ Հնարավոր է՝ հենց հիմա անեի», - նշել է Թրամփը։
Նրա կարծիքով՝ ամեն ինչ այժմ «շատ լավ» է ընթանում։
Այնուամենայնիվ, Թրամփը նշել է, որ կհամարի պարտություն, եթե Իրանի ներկայիս ռեժիմը մնա իշխանության գլուխ մինչև իր նախագահական ժամկետի ավարտը։
Այն հարցին, թե ինչ կլինի, եթե Թեհրանը սպանի ամերիկացի պաշտոնյայի, Թրամփը պատասխանել է. «Նրանք այլևս գոյություն չեն ունենա»։
