Այս հերթական ստորացումը Ադրբեջանին չի կանգնեցնելու․ Պահանջներն աճելու են․ Տիգրան Աբրահամյան
ԱԺ «Պատիվ ունեմ» խմբակցության պատգամավոր Տիգրան Աբրահամյանն անդրադարձել է Ադրբեջանի նախագահ Իլհամ Ալիևի այսօր հնչեցրած հայտարարությանը՝ «խաղաղություն կլինի, եթե Հայաստանը փոխի իր Սահմանադրությունը»։
«Ալիևն այսօր, ըստ էության, հաստատել է վերջին շրջանում լայն քննարկումների առարկա դարձած ՀՀ սահմանադրական փոփոխություններում իրենց մեծ հետաքրքրությունը:
Եթե նույնիսկ սա չէր արվել Ադրբեջանի պահանջով, ապա Բաքուն մտավ խաղի մեջ և, օգտվելով ՀՀ իշխանության «պասից», մինչև վերջ կսեղմի:
Եթե սա, այնուամենայնիվ, Հայաստան-Ադրբեջան բանակցությունների կուլիսային փոխըմբռման հետևանք է` կրկին վատ է, որ Ադրբեջանը ոչնչացնում է Հայաստանին, իսկ Հայաստանը շարունակում է ծնկի գալ ու զիջել. ի դեպ, այս հերթական ստորացումը Ադրբեջանին չի կանգնեցնելու` պահանջներն աճելու են»,- ֆեյսբուքյան իր էջում գրել է Տիգրան Աբրահամյանը:
