Իսրայելի հարվածների հետևանքով Ռաֆահում 100 մարդ է զոհվել

Իսրայելի պաշտպանության բանակը (ՑԱԽԱԼ) հայտարարել է Գազայի հատվածի հարավում գտնվող Ռաֆահ քաղաքի Ալ-Շաբուրա թաղամասի թիրախներին հարվածներ հասցնելու մասին:  Այս մասին հայտնում է Al Mayadeen հեռուստաալիքը նշելով, որ իսրայելական հարձակման հետևանքով Ռաֆահում զոհվել է 100 մարդ, ավելի քան 230-ը՝ վիրավորվել։

Իսրայելական բանակը հայտնել է նաև Ռաֆահում իրականացված գործողության ընթացքում հոկտեմբերի 7-ին ՀԱՄԱՍ-ի կողմից առևանգված երկու պատանդի հայտնաբերման մասին։

«Իսրայելի պաշտպանության բանակի, Իսրայելի անվտանգության գործակալության (ISA) և իսրայելական ոստիկանության համատեղ գործողության ընթացքում Ռաֆահում երկու իսրայելցի պատանդ է ազատ արձակվել՝ 60-ամյա Ֆերնանդո Սիմոն Մարմանը և 70-ամյա Լուիս Հարը, որոնք առևանգվել էին ՀԱՄԱՍ ահաբեկչական կազմակերպության կողմից հոկտեմբերի 7-ին Նիր-Իցհակ կիբուցից»,- ասված է բանակի հաղորդագրության մեջ։

Հաղորդվում է, որ ազատ արձակված պատանդները «լավ վիճակում են», նրանց տեղափոխել են բուժզննման։