Թուրքիայի առևտրի նախարարությունը հայտարարել է Իսրայելի հետ առևտուրը դադարեցնելու մասին
Պետական մակարդակով ձեռնարկվող միջոցառումների երկրորդ փուլը սկսվել է, դադարեցվել են Իսրայելի հետ կապված արտահանման-ներմուծման գործառնությունները՝ ընդգրկելով ապրանքների բոլոր խմբերը։ Այս մասին ասվում է Թուրքիայի առևտրի նախարարության հաղորդագրության մեջ, գրում է «Անադոլու» գործակալությունը։
«Իսրայելի սկսած կոտորածը, մարդասիրական աղետը և ֆիզիկական ավերածությունները շարունակվեցին, և Իսրայելի կառավարությունն անպատասխան թողեց հրադադարի միջազգային ջանքերը և արգելափակեց մարդասիրական օգնությունը: Այս կապակցությամբ 2024 թվականի ապրիլի 9-ից Թուրքիան սահմանափակել է 54 խմբերի ապրանքների արտահանումը Իսրայել։ Այս որոշմամբ ընդգծվում է, որ սահմանափակող միջոցները ուժի մեջ կմնան այնքան ժամանակ, քանի դեռ Իսրայելը Գազայի հատվածում անհապաղ զինադադար չի հայտարարել և ապահովել մարդասիրական օգնության բավարար անխափան հոսք։
Այդ կապակցությամբ սկսվել է պետական մակարդակով ձեռնարկվող միջոցառումների երկրորդ փուլի իրականացումը։ Իսրայելի հետ կապված արտահանման-ներմուծման գործառնությունները դադարեցվել են ապրանքների բոլոր խմբերի համար։ Թուրքիան խստորեն և վճռականորեն կիրականացնի այս նոր միջոցառումները, քանի դեռ Իսրայելի կառավարությունը թույլ չի տա մարդասիրական օգնության անխափան և բավարար հոսք Գազա»,- ասվում է Թուրքիայի առևտրի նախարարության հայտարարության մեջ։
