Այն, ինչ երեկ տեղի ունեցավ ԱԳՆ-ի մոտ, պլանավորած սադրանքի հետևանք էր, որով իշխանությունները փորձում էին լուծել մի քանի խնդիր․ ABC media-ի տաղավարում ասել է փաստաբան Սերգեյ Հարությունյանը։
«Առաջին հերթին՝ հասկանալով, որ ինքնաբուխ հավաքը բազմամարդ է դառնում, ցանկանում էին ցրել, այնտեղ հավաքված ժողովրդին, ցանկանում էին բռնություն և ուժ կիրառել վախեցնելու համար։ Երրորդը՝ ցանկանում էին Սրբազանի մոտ կանգնած մարդկանց մեկուսացնել։ Ինչ-որ առումով ստացվեց»,-ասել է նա։
Փաստաբանի խոսքով՝ մենահեռահար միտքը, նպատակն այն էր, որ «զանգվածային անկարգություններ» ձևակերպմամբ հոդվածը օգտագործեն, որպեսզի ցույց տան, որ այդ անկարգությունները տեղի են ունեցել, և դրա կազմակերպիչը շարժման առաջնորդներն են։
Նա նշել է, որ 29-անձ բերման է ենթարկվել, նրանցից 2-ը, այդ թվում՝ Դանիել սարկավագը, ազատ են արձակվել, քանի որ չեն հասցրել 6-ժամյա ռեժիմով մեղադրանք ներկայացնել։
«Մնացածները ձերբակալված են և այժմ գտնվում են տարբեր ՁՊՎ-ներում, որովհետև տեխնիկական պատճառներով հնարավոր չէր բոլորին Երևանում պահել, տեղափոխել են Մասիս, Աբովյան։ Բոլորի նկատմամբ վարույթ է հարուցված՝ զանգվածային անկարգությունների հոդվածով»,-ասել է նա։
Հարությունյանի խոսքով՝ իշխանությունը չի կարողանալու հասնել շարժումը թուլացնելու իրենց նպատակին, քանի որ այդ ամենն անարդյունավետ է։
«Բացառվում է, որ շարժումը դրանից թուլանա, ընդհակառակը, այսօրվա երթը ցույց տվեց, թե որքան բազմամարդ է և ինչ ընդունելության արժանացավ Սրբազանը»,-ասել է փաստաբանը։
