Սպասելի և ճիշտ քայլ էր. Վարդան Ղուկասյանն ABC media-ի հետ զրույցում մեկնաբանել է Մարտուն Գրիգորյանի հայտարարությունը
Գյումրիի քաղաքապետի թեկնածու Վարդան Ղուկասյանը ծանոթացել է Մարտուն Գրիգորյանի՝ իր ընտրության սատարելու հայտարարությանը: ABC media-ի հետ զրույցում Ղուկասյանն ասել է, որ տեղի ունեցածն իր համար սպասելի էր:
«Փառք Տիրոջը. Աստծո կամոք է ամեն ինչ։ Մինչև ընտրությունները ես միշտ խնդրել եմ Տիրոջը՝ ինչ-որ քո կամոք է, թող կատարվի, ինչը մարդկային կամոք, թող չկատարվի։ Այո՛, սպասելի էր, որովհետև ճիշտ արեց ինքը, դա շատ ճիշտ քայլ էր։ Մեկ բան գիտեմ, որ լուրջ ծանրության տակ ենք մտել, պետք է պատվով կատարենք։ Դա այդպես հեշտ ու հանգիստ գործ չէ: Ինչ-որ մարդիկ մտածում են և գիտակցաբար այդ մեծ լծի տակ են լինում։ Հուսով եմ, որ Աստծո օգնությամբ և ժողովրդի օգնությամբ կկատարենք»,- ասել է նա։
Հիշեցնենք, որ այսօր Մարտուն Գրիգորյանը հայտարարել է Վարդան Ղուկասյանի ընտրության համար անհրաժեշտ քվեները տալու պատրաստակամության մասին և նշել, որ դրա դիմաց ակնկալիքներ չունեն:
