ՀԱՊԿ-ում Հայաստանին ձայնի իրավունքից զրկելու հարցը կարող է քննարկվել նոյեմբերին․ Գալուզին
ՀԱՊԿ-ում Հայաստանին ձայնի իրավունքից զրկելու հարցը կարող է քննարկվել կազմակերպության՝ նոյեմբերի 11-ի գագաթնաժողովում։ Այս մասին ТАСС-ի հետ զրույցում հայտարարել է Ռուսաստանի արտաքին գործերի փոխնախարար Միխայիլ Գալուզինը:
«Կազմակերպության անդամներից մեկի նկատմամբ սահմանափակող միջոցների հնարավոր կիրառման վերաբերյալ ցանկացած որոշում ամբողջությամբ տեղավորվում է Հավաքական անվտանգության խորհրդի իրավասությունների մեջ։ Ղեկավարներն իրավունք ունի նման որոշումներ կայացնել կազմակերպության կանոնադրության դրույթների հիման վրա։ Խորհրդի հաջորդ նիստը կկայանա Մոսկվայում նոյեմբերի 11-ին», – նշել է Գալուզինը։
Նրա խոսքով՝ ՀԱՊԿ կանոնադրությունը միջազգային պայմանագիր է, որը պետք է կատարեն դրա բոլոր կողմերը։ Պարտավորություններից է նաև ՀԱՊԿ մարմինների գործունեության ֆինանսավորումն անդամ պետությունների կողմից։
«Երևանի կողմից կազմակերպության աշխատանքներին մասնակցելուց հրաժարվելը և տարեկան բյուջեի որոշումները չստորագրելը պարզապես նշանակում է իր իրավունքը չիրականացնելը, բայց չի դադարեցնում Հայաստանի պարտավորությունը՝ ժամանակին կատարել վճարումները», – նշել է դիվանագետը։
«Հիմնվելով ինստիտուցիոնալ արդյունավետության պահպանման սկզբունքի վրա՝ ցանկացած միջազգային կազմակերպություն ունի այս իրավիճակի համար ընթացակարգեր, ինչպես նշված է իր հիմնադիր փաստաթղթերում։ ՀԱՊԿ-ը բացառություն չէ», – նշել է Ռուսաստանի փոխարտգործնախարարը։
