Ակցիայի ժամանակ տեղեկացանք, որ Ոսկեպարի եկեղեցու մոտակայքում ադրբեջանցիներ են հայտնվել, ակցիան դադարեցրինք, շտապեցինք Ոսկեպար։ Այստեղ ադրբեջանցիներն աշխատանքներ էին կատարել․ Կիրանցում լրագրողների հետ զրույցում ասել է ԱԺ պատգամավոր Գառնիկ Դանիելյանը։
«Գյուղից էլի փորձում են ապօրինի կերպով իրենց գործընթացը տանել առաջ, ուժով, բիրտ ուժով, խաբելով, մանիպուլացնելով։ Այսինքն ստեղծվում է մի վիճակ, որ այս իշխանությունն ամեն կերպ փորձում է իր առաջ դրած խնդիրը կատարել՝ թուրքին բերել-հասցնել այս վայրեր»,-ասել է նա։
Դանիելյանը խոսել է նաև այն մասին, որ ադրբեջանցի սահմանապահերն իրականում միայն անունով են սահմանապահ, նրանց անվան տակ ադրբեջանական զորքն է կանգնելու։
«Այսինքն՝ իրենց բանակը հագել է սահմանապահի համազգեստ, մնացած ամեն ինչ նույնն է, մեր սահմանապահը, որ պիտի գա, կանգնի, ընդամենը «Կալաշնիկով» զենքով է զինված, ուրիշ ոչ մի բան չունի»,-ասել է Դանիելյանը՝ ընդգծելով, որ սահմանապահների անվան տակ ադրբեջանցիներն առաջ են գալիս, իրենց համար տեղ ընտրում ու փորձում դիրքավորվել։
«Վտանգը կայանում է նաև նրանում, որ ցանկացած պահի, ցանկացած վայրկյանի էն սահմանապահ կոչեցյալ ադրբեջանցիները շատ ավելի լավ դիրքերից, շատ ավելի լավ կարգավիճակով կարող են հարձակում գործել, և հաշված րոպեների ընթացքում հայկական բնակավայրերի վրա վերահսկողություն սահմանել»,-ասել է նա։
