Միայն ռազմական ուժը չէ, որ զենք է․ Բորել
Ժամանակակից աշխարհում երկրների հզորությունը միայն նրանց ռազմական հզորության մեջ չէ այսօր ցանկացած ոլորտում ազդեցությունը կարող է որպես զենք օգտագործվել։ Նման կարծիք է հայտնել ԵՄ արտաքին գործերի և անվտանգային քաղաքականության գերագույն ներկայացուցիչ Ժոզեպ Բորելը՝ ամերիկյան Foreign Policy ամսագրին տված հարցազրույցում։
«Այսօր ամեն ինչ դառնում է զենք, միայն ռազմական ուժը չէ, որ զենք է»,- ասել է Բորելը՝ պատասխանելով այն հարցին, թե ինչպիսին պիտի լինի Եվրոպայում «ուժի լեզուն»:
Բորելի խոսքով՝ այսօրվա «ավելի կոնֆլիկտային» աշխարհում անհրաժեշտ է լծակներ ունենալ տարբեր ոլորտներում։ Նման լծակներ ունի ԵՄ–ն, սակայն այժմ Եվրոպան պետք է գտնի «քաղաքական կամք»՝ դրանք օգտագործելու համար։
Ավելի վաղ եվրոպական դիվանագիտության ղեկավարն արդեն հայտարարել էր, որ Եվրամիությունը պետք է սովորի օգտագործել ուժի լեզուն։
Նրա խոսքով՝ նախկինում Եվրամիությունը հետևում էր «եվրոպական քաղաքականության մեջ ուժի կիրառումը բացառելու» կուրսին, քանի որ կարծում էր, որ առևտրի վրա հիմնված հարաբերությունները կվերացնեն նման կիրառման անհրաժեշտությունը։
