Միջազգային կազմակերպությունները կոչ են արել միջազգային հանրությանը ճնշում գործադրել Ադրբեջանի վրա

«Լրագրողներ առանց սահմանների» կազմակերպությունը միջազգային հանրությանը կոչ է արել ճնշում գործադրել Ադրբեջանի իշխանությունների վրա՝ լրագրողներին ազատ արձակելու և մարդու իրավունքների խախտումները դադարեցնելու համար։ «Մուտքի սահմանափակումներ, ֆիզիկական բռնություններ, ձերբակալություններ. Ադրբեջանում՝ նավթագազային պետությունում, որն իր եկամուտի ավելի քան 90%-ը ստանում է ածխաջրածինների արտահանումից, լրագրողները, ովքեր լուսաբանում են այնպիսի զգայուն թեմաներ, ինչպիսին է շրջակա միջավայրը, աշխատում են ականապատ դաշտում։ Վերջին մեկ տարվա ընթացքում իշխանությունները մոտ 15 լրագրողի են ձերբակալել իրենց աշխատանքի համար»,- նշվել է կազմակերպության հայտարարության մեջ:

«Լրագրության, հատկապես բնապահպանական լրագրության, պաշտպանությունը պետք է նախապայման լինի ՄԱԿ-ի կլիմայական համաժողովի անցկացման համար: Ինչպե՞ս կարող եք ընդունել, որ նավթագազային երկիրը, որը բանտ է նետում իր անկախ լրագրողներին, գլոբալ կլիմայի ապագան որոշող իրադարձությունների հյուրընկալողն է»:

Նյու Յորքում տեղակայված Լրագրողների պաշտպանության կոմիտեն (CPJ) ևս  կոչ է արել Բաքվում COP29-ի գագաթնաժողովին մասնակցող պատվիրակություններին ճնշում գործադրել Ադրբեջանի իշխանությունների վրա անկախ լրատվամիջոցների ներկայացուցիչների նկատմամբ ճնշումների պատճառով:

«Մամուլի նկատմամբ Ադրբեջանի վերաբերմունքը լիովին անհամատեղելի է մարդու իրավունքների արժեքների հետ, այն էլ ՄԱԿ-ի համաժողովը հյուրընկալող երկրում»,- նշել է CPJ Եվրոպայի և Կենտրոնական Ասիայի ծրագրերի համակարգող Գյուլնոզա Սաիդը։