Թույլ չենք տա թշնամիներին խաթարել Հայաստանի հետ մեր հարաբերությունները. Իրանի ԱԽ քարտուղար
Թեհրանում ՀՀ ԱԽ քարտուղար Արմեն Գրիգորյանը հանդիպել է Իրանի ազգային անվտանգության գերագույն խորհրդի քարտուղար Ալի Աքբար Ահմադիանի հետ։ Tasnim գործակալության փոխանցմամբ՝ Ահմադիանը հայտարարել է, որ Իրանի և Հայաստանի միջև ռազմավարական հարաբերությունները և սերտ համագործակցությունը բոլոր ոլորտներում կնպաստեն տարածաշրջանային խաղաղությանն ու կայունությանը:
«Իրանը թույլ չի տա թշնամիներին որևէ վնաս հասցնել երկու հարևանների միջև լավ հարաբերություններին»,- հայտարարել է Ահմադիանը:
Ընդգծելով բոլոր հարևանների հետ սերտ կապեր պահպանելու Իրանի քաղաքականությունը՝ Ահմադիանն ասել է, որ կողմնակի անձինք շահագրգռված չեն տարածաշրջանում խաղաղությամբ: Իրանցի պաշտոնյան նաև ընդգծել է Թեհրանի և Երևանի միջև համատեղ նախագծերի լիարժեք իրականացման անհրաժեշտությունը:
Գրիգորյանն իր հերթին շնորհակալություն է հայտնել Իրանին՝ Հայաստանին աջակցելու համար ու ընդգծել, որ Հայաստանի և Իրանի միջև հարաբերությունների ընդլայնումը կախված չէ ուրիշների կամքից: Հայ պաշտոնյան նաև բարձր է գնահատել իրանական մասնավոր հատվածի գործընկերությունը Հայաստանի տնտեսական և էներգետիկ նախագծերում:
