Լավրովի՝ Հայաստան այցի արդյունքները կարելի է անվանել «փայլուն»․ փորձագետներ

Ռուսաստանի արտաքին գործերի նախարար Սերգեյ Լավրովը երկօրյա այցով Հայաստանում էր։ Այցելությունը մեծ ուշադրություն է գրավել, քանի որ տեղի է ունենում երկկողմ հարաբերությունների համար դժվարին ժամանակաշրջանում։ NEWS.ru-ի հետ զրուցած փորձագետները նշել են, որ Մոսկվան և Երևանը, չնայած իրենց տարաձայնություններին, շարունակում են գտնել ընդհանուր լեզու, և Լավրովի՝ Հայաստան այցի արդյունքները կարելի է անվանել փայլուն։

Պետդումայի պատգամավոր Միխայիլ Մատվեևը NEWS.ru-ի հետ զրույցում նշել է, որ Ռուսաստանի Դաշնությունը միշտ փորձել է օգնել Հայաստանին, սակայն բացահայտ հակառուսական հարձակումները հանրապետությունում հազվադեպ չեն։ «Փաշինյանի օրոք այս ամենը ծաղկել է։ Եվ սա զուտ արտաքին քաղաքականության ուղերձ է՝ Արևմուտքին ցույց տալու համար, որ Ռուսաստանի և Արևմուտքի միջև քաղաքակրթական հակամարտության մեջ նրանք ընտրել են Արևմուտքի կողմը», – ընդգծել է պատգամավորը։

Փորձագետների կարծիքով՝ ռուս-հայական հարաբերությունների ամենամեծ անկայունացումը պայմանավորված է Երևանի կողմից Արևմուտքի հետ մերձեցման կուրսով։ Փորձագետ Սերգեյ Բեսպալովի խոսքով՝ Հայաստանի իշխանությունները կփորձեն խուսափել Ռուսաստանի Դաշնության հետ հարաբերություններում կտրուկ տեղաշարժերից՝ ՀԱՊԿ-ի և ԵԱՏՄ-ի կողմից տրամադրվող առավելությունները որքան հնարավոր է երկար պահպանելու համար։ Չնայած դժվարին իրավիճակին՝ երկրների միջև հարաբերությունները բարելավելու հնարավորություն կա, վստահ է նա։ «Դրական փոփոխությունների հնարավորություններ կան ՀՀ-ում խորհրդարանական ընտրություններից հետո: Վերջերս լուրեր են շրջանառվում, որ Ռուսաստանի և Հայաստանի միջև հարաբերությունները վերաբերյալ հարցերը փոխանցվել են ՌԴ նախագահի աշխատակազմի ղեկավարի առաջին տեղակալ Սերգեյ Կիրիենկոյի իրավասությանը», – նշել է փորձագետը։ Նա հիշեցրել է, որ Կիրիենկոն արդեն իսկ հաջող փորձ ունի այլ պետությունների հետ հարաբերություններում վեճերը լուծելու հարցում։