Թեհրանը կողմ է ապաշրջափակմանը՝ տարածքային ամբողջականության պահպանմամբ. Իրանի ԱԳՆ խոսնակ
Ցանկացած տրանսպորտային ուղի պետք է իրականացվի՝ հարգելով միջազգային ճանաչում ունեցող սահմանները և չխախտելով որևէ պետության ինքնիշխանությունը կամ տարածքային ամբողջականությունը. «Արմենպրես»-ին տված հարցազրույցում հայտարարել է Իրանի արտաքին գործերի նախարարության մամուլի խոսնակ Էսմայիլ Բաղային:
«Մենք հստակորեն նշել ենք, որ ցանկացած տրանսպորտային ուղի պետք է իրականացվի՝ հարգելով միջազգային ճանաչում ունեցող սահմանները և չխախտելով որևէ պետության ինքնիշխանությունը կամ տարածքային ամբողջականությունը», – ասել է նա:
Բաղային ընդգծել է, որ չի կարելի թույլ տալ երրորդ կողմերին՝ ոչ տարածաշրջանային դերակատարներին, միջամտել Հարավային Կովկասում ընթացող գործընթացներին. նրա խոսքով՝ միջամտությունները միայն կբարդացնեն վիճակը և չեն ծառայի տարածաշրջանի պետությունների շահերին։
«Այսպիսով, չնայած մենք աջակցում ենք Հարավային Կովկասի երկրների և Իրանի միջև տրանսպորտային ուղիների և կապի ընդլայնմանը, մենք պետք է իսկապես զգույշ լինենք։ Նախ՝ չփոխել միջազգայնորեն ճանաչված սահմանները, որևէ կերպ չխախտել որևէ պետության ազգային ինքնիշխանությունը կամ տարածքային ամբողջականությունը», – հավելել է Իրանի ԱԳՆ խոսնակը։
