Ադրբեջանն ու ԱՄՆ-ն կստեղծեն ռազմավարական աշխատանքային խումբ՝ երեք ոլորտներում գործակցության համար
Ադրբեջանը և Միացյալ Նահանգները կստորագրեն ռազմավարական գործընկերության կանոնադրությունը մշակելու համար ռազմավարական աշխատանքային խումբ ստեղծելու վերաբերյալ փոխըմբռնման հուշագիր․ այս մասին հայտնել է APA գործակալությունը։
Ըստ գործակալության՝ փաստաթուղթը կստորագրվի Վաշինգտոնում՝ Ադրբեջանի նախագահ Իլհամ Ալիևի աշխատանքային այցի ընթացքում։
Ադրբեջանի և Միացյալ Նահանգների միջև ռազմավարական գործընկերությունը կներառի երեք ոլորտ՝ տարածաշրջանային կապ՝ ներառյալ էներգետիկան, առևտուրը և տարանցումը, ներդրումներ՝ ներառյալ արհեստական բանականությունը և թվային ենթակառուցվածքները, անվտանգության ոլորտում գործակցություն՝ ներառյալ պաշտպանական ոլորտում վաճառքները և ահաբեկչության դեմ պայքարը։
Ռազմավարական աշխատանքային խումբը կքննարկի մի շարք առանցքային հարցեր՝ սկսած տարածաշրջանային կապի ենթակառուցվածքների ընդլայնումից մինչև էներգետիկ ոլորտում ներդրումներ։ Օրակարգում են նաև տնտեսական և առևտրային համագործակցության խթանումը, ինչպես նաև արհեստական բանականության զարգացումը։
