Հանդիպման համար նախատեսված համաձայնագրերը չեն համապատասխանում Երևանի շահերին․ Զատուլին
ԱՄՆ-ում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև հանդիպման համար նախատեսված համաձայնագրերը չեն համապատասխանում Երևանի շահերին։ Այս մասին ТАСС -ի հետ զրույցում հայտարարել է Պետդումայի ԱՊՀ հարցերով հանձնաժողովի նախագահի առաջին տեղակալ Կոնստանտին Զատուլինը՝ մեկնաբանելով Բաքվի և Երևանի միջև նախապատրաստվող խաղաղության պայմանագրի պայմանները։
Ավելի վաղ լրատվամիջոցները հայտնել էին, որ Բաքվի և Երևանի միջև խաղաղության պայմանագրի շրջանակներում ԱՄՆ-ն առաջարկել է «Զանգեզուրի միջանցքի» վերահսկողությունը փոխանցել մասնավոր ընկերությանը։
«Սա ոչ մի կերպ չի կարող օգտակար լինել Հայաստանի համար, եթե, իհարկե, խոսքը անձամբ Փաշինյանի մասին չէ, քանի որ նա չի մտածում ազգային շահերի տեսանկյունից», – նշել է պատգամավորը՝ հավելելով, որ նա փորձում է ինտեգրել Հայաստանն ու իրեն արևմտյան աշխարհին, միաժամանակ հրաժարվելով ազգային շահերից։ Սա, իհարկե, համապատասխանում է Ադրբեջանի և Թուրքիայի շահերին»։
Խորհրդարանականը նշել է, որ եթե խաղաղ կարգավորման միջնորդության գինը «Զանգեզուրի միջանցքի» փոխանցումն է ԱՄՆ վերահսկողությանը, ապա դա նաև սպառնալիք կդառնա Իրանի համար։ «Սա, անշուշտ, Միացյալ Նահանգների և որոշ չափով՝ Իսրայելի շահերից է բխում, քանի որ Զանգեզուրի միջանցքը և Ադրբեջանի ու Թուրքիայի միավորումը, իհարկե, սպառնում են ոչ միայն մեզ, այլև՝ Իրանին», – նշել է պատգամավորը։
