Իրանի ազգային անվտանգության հայեցակարգում նշված է, որ Իրանը բոլոր
15 հարևանների հետ պիտի ունենա բարիդրացիական հաարաբերություններ, հետևաբար մեկի օգտին,
մյուսի հաշվին մյուսի հետ թշնամանալը դեմ է իրենց ազգային անվտանգության հայեցակարգին։
Այս մասին ABC Media-ի հետ զրույցում ասաց իրանագետ Հարութ Արթին Առաքելյանը, մեկնաբանելով
Իրանի ԱԳՆ-ի այն հայտարարությունը, որ Ադրբեջանի հետ հավանական պատերազմի դեպքում Իրանի
զորքերը Հայաստան չեն մտնելու և դա անհիմն լուրեր են։
«Մենք բազմիցս ասել ենք, որ Իրանը Հայաստան զորք չի մտցնելու։ Դիվանագիտության
մեջ իրանը կփորձի իր բոլոր ջանքերը գործադրել և պատերազմը չեղարկի, եթե լինի պատերազմի
պոտենցիալ վտանգ, հակառակ դեպքում, եթե մենք հաշվի առնենք, որ Ադրբեջանը միևնույն ժամանակ
փորձելու է ագրեսիա իրականացնել Հայաստանի դեմ, եթե փորձենք կանխագուշակել Իրանի քայլերը, ապա Իրանը ոչ թե Հայաստան կմտնի, սրա մասին գոնե 2-3 տարի է հայտարարում ենք, այլ
Իրանը տարածաշրջանում կկանխարգելի Իսրայելական, ամերիկյան ահաբեկչական գործողությունները»,-
ասաց Իրանագետը։
Նրա խոսքով, հենց դրա համար վերջին շրջանում Փաշինյանի ոչ բարիդրացիական
բնույթ ունեցող հայտարարություններից հետո նկատելի էր, որ Իրանական կողմն այլևս չխոսեց
Հայաստանի սահմանները որպես կարմիր գծեր և խոսույթը փոխելով հայտարարեց, որ ինքը մտահոգված
է իր սահմաններին տեղակայված են ահաբեկչական խմբավորումներ ու եթե հարկ լինի,ինքը նույնպես
կմտնի և կստեղծի բուֆեր։
«Դա Իրանի մեր կողմից ենթադրյալ քայլը կարող է լինել, որը
կամ Նախիջևանի տարածք է մտնելու կամ Արցախի հարավային գրավյալ տարածքներ, որտեղ ահաբեկչական
խմբավարումների առկայությունը շահագործելով մուտք ունենա տարածաշրջան և կանխի հավանական
միջանցքի ճեղքումը։ Սա կարող ենք ասել որ կլինի Իրանի հավանական քայլը, բայց ենթադրել,
որ Իրանը պետք է Հայաստան զորք մտցնի ու պատերազմի Ադրբեջանի դեմ, դա այն քաղաքական
միֆն է, որ իշխանությունը կամ իր մերձավոր շրջապատը փորձում են տարածել»,- ասաց Հարութ
Արթին Առաքելյանը։
