Աննախադեպ դատավճիռ է, Հայաստանում դեռևս ոչ մեկին նման պատիժ չէր տրվել․ Ավետիք Չալաբյան
Իմ դեմ քրեական գործի նպատակը ի սկզբանե եղել է վարկաբեկելն ու
իմ քաղաքական գործունեությունը սահմանափակելը, և օրենքն ու իրավունքը զոհաբերվել են
նպատակին․ հայտարարել է հասարակական-քաղաքական գործիչ, «Հայաքվե» նախաձեռնության
համակարգող Ավետիք Չալաբյանը:
«Այն հարուցվել է օրենքի խախտումով, փաստացի մի մերձիշխանական կիսալեգալ
կայքի միջոցով կազմակերպված մատնության միջոցով: Այդ հիմքով ընդհանրապես քրական գործ
չպետք է հարուցվեր:
Այդ գործը հարուցվել է մի հոդվածով, որը պետք է վերացվեր 2022-ի
հուլիսի 1-ին ուժի մեջ մտնող քրեական նոր օրենսգրքով: Սակայն այդ վերացումից տառացիորեն
մի քանի օր առաջ ՔՊ իշխող մեծամասնությունը ԱԺ-ում արագացված եղած քրեական օրենսգրքի
236-րդ հոդվածին ապօրինի կարկատան է կատարել, մի նախադասություն է ավելացրել, որով
այս արարքը նորից քրեականացվել է: Ընդ որում՝ նախատեսվել է ավելի խիստ պատիժ: Զարգացած
որեւէ երկրում այսպիսի արարքը ընդհանրապես քրեականացված չէ»,-ասել է Չալաբյանը:
Նա նշել է, որ դատարանում իր մեղքն այդպես էլ չի ապացուցվել, իսկ
դատարանն ի սկզբանե քաղաքական պատվեր էր կատարում։
«Այդ դատավճիռը Հայաստանի պատմության մեջ նախադեպը չունի: Այսպիսի
դատավճիռ, այսպիսի պատիժ դեռ ոչ մեկին չի տրվել: Երեւի մեր խաչն է, որ պետք է այսպիսի
դատավճիռ կրենք: Մենք ամեն ինչ կանենք, որ այս դատավճիռն ուժի մեջ չմտնի»,- ընդգծեց
նա:
Հիշեցնենք, որ Երևան քաղաքի առաջին ատյանի դատարանի որոշմամբ
Ավետիք Չալաբյանին արգելվել է կազմակերպել և մասնակցել հավաքների և այլ հանրային միջոցառումների,
ինչպես նաև փոխել բնակության վայրը առանց պատժի նկատմամբ հսկողություն իրականացնող
մարմնի տեղեկության։
