Հնարավորություն տվեք ինձ, մեկ օրում ամեն ինչ կարգավորեմ․ Ծառուկյանը՝ հայկական մթերքը ՌԴ ներմուծելու արգելքի մասին
Բոլորը շփոթված են, խառնված, բազմաթիվ գործարարներից զանգեր եմ ստացել, մարդիկ չգիտեն՝ ինչ են անելու․ նախընտրական քարոզարշավի ժամանակ անդրադառնալով Ռուսաստանի՝ Հայաստանից պտուղ-բանջարեղենի և այլ ապրանքների ներմուծումն արգելելու որոշմանն՝ ասաց «Բարգավաճ Հայաստան» կուսակցության առաջնորդ Գագիկ Ծառուկյանը։
Նա նշեց, որ մարդիկ հազարումի պլաններ-ծրագրեր, վճարելու վարկեր ու հարկեր ունեն, բայց փաստի առաջ են կանգնել։
«Միրգ-բանջարեղենը հավաքել են ու չգիտեն՝ ինչ անել, որտեղ տեղավորել, փչանում է։ Ես մեկ ամիս է զգուշացնում եմ՝ որ էսպես է լինելու։ Ասում եմ՝ հնարավորություն տվեք ինձ, մի օրում ամեն ինչ կարգավորեմ։
Էսօր անդունդի եզրին ենք։ Տնտեսությունը երկիր պահողն է, ժողովրդին կերակրողը, և եթե քանդվեց, ի՞նչ է լինելու։ Մի բան պետք է հասկանալ, որ տնտեսությունը չի լինում իշխանական կամ ընդդիմադիր»,- շեշտեց Ծառուկյանը։
