Նավթի գները բարձրացել են Իրանին ուղղված ԱՄՆ նոր սպառնալիքներից հետո

Նավթի գները շարունակել են աճել՝ Իրանին ուղղված ԱՄՆ նոր սպառնալիքներից հետո․ ԱՄՆ-ն սպառնացել է անորոշ ժամանակով Իրանի նկատմամբ ծովային շրջափակում կիրառել։

Al Jazeera-ն սա բացատրում է նավթի համաշխարհային մատակարարումների վերաբերյալ մտահոգությունների աճով։

Brent նավթի ֆյուչերսները, ըստ տեղեկությունների, աճել են 90 ցենտով կամ 1.03%-ով՝ հասնելով 87.97 դոլարի մեկ բարելի համար։

ԱՄՆ West Texas Intermediate (WTI) նավթի գինը բարձրացել է 91 ցենտով՝ հասնելով 82.16 դոլարի մեկ բարելի համար։

Իրանի նկատմամբ ծովային շրջափակում կիրառելու ԱՄՆ սպառնալիքը մեծացրել է մտահոգությունները Հորմուզի նեղուցով և ամբողջ տարածաշրջանից նավթի մատակարարումների անվտանգության վերաբերյալ։ Այս նեղուցում, որն աշխարհի ամենակարևոր նավթային փոխադրման ուղիներից է, ցանկացած երկարատև լարվածություն կարող է խաթարել նավթի մատակարարումները համաշխարհային շուկաներ։