Կաթողիկոսի գործով նոր դատավորի արածն ավելի վատ էր, քան նախորդի արածը․ փաստաբան
Դատավոր Սերժ Ռուշանյանի արածը, իմ կարծիքով, ավելի վատ էր, քան նախորդ դատավորի արածը․ Facebook-ի իր էջում գրել է փաստաբան Ռուբեն Մելիքյանը։
«Ընդդատության տեսությունը (ընդդատությունն իրավական հասկացություն է, որը ցույց է տալիս, թե կոնկրետ որ դատարանն է իրավասու քննել և լուծել տվյալ գործը- խմբգ․) մի առանձնապես բարդ մաթեմատիկա չէ․ գործն ըստ ընդդատության՝ կարելի է ուղարկել միայն այն դեպքում, երբ ենթադրյալ արարքը վստահաբար կատարվել է մեկ այլ (կոնկրետ) դատարանի դատական տարածքում։ Իսկ եթե հստակություն չկա, ապա դատարանը չի կարող նման կերպ վարվել։ Վերջ։
Հարց եմ տալիս- ինչո՞ւ Երևան, այլ ոչ թե, օրինակ, Շիրակի կամ Սյունիքի մարզ»,- գրել է նա։
Հիշեցնենք, որ վեհափառի ու 6 սրբազանների գործով դատական նիստին դատավորը որոշել է գործն ուղարկել Երևանի քրեական առաջին ատյանի դատարան։ Այդտեղ պետք է քննվի ու պարզվի՝ արդյոք ճի՞շտ է քրգործը քննել Արմավիրի դատարանում։
