Ե՞րբ կհրապարակվի Ստեփան Ասատրյանի գործով դատավճիռը

Ստեփան Ասատրյանի՝ իրեն կարգալույծ հռչակելու որոշումը վիճարկելու գործով դատաքննությունն ավարտվել է, սակայն վճիռը սահմանված ժամկետում չի հրապարակվել։ «ԴատաԼեքս»-ում վճռի հրապարակման օրն օգոստոսի 17-ն է։ 66 օր է անցել սահմանված ժամկետից, բայց վճիռը չկա։

ABC Media-ն քաղաքացիական դատարանից փորձեց պարզել՝ ինչո՞ւ հրապարակված չէ։ Հստակ պատճառ չնշվեց, խոստացան վճիռը հրապարակել վաղը՝ հոկտեմբերի 23-ին՝ սահմանված ժամկետից 67 օր անց։

Հիշեցնենք՝ Ստեփան Ասատրյանը պահանջում էր անվավեր ճանաչել Ամենայն Հայոց Կաթողիկոս Գարեգին Բ-ի՝ 2025 թվականի հոկտեմբերի 21-ի տնօրինությունը և վերականգնել իրեն Սուրբ Հովհաննավանքի հոգևոր հովվի պաշտոնում։

Գործը քննում է դատավոր Սիմա Աբովյանը։ Փետրվարի 13-ին դատարանը հայցի ապահովման միջոց էր կիրառել՝ պարտավորեցնելով Հայ Առաքելական Սուրբ Եկեղեցուն և այլ անձանց չխոչընդոտել Ասատրյանի պաշտոնավարմանը մինչև գործով վերջնական դատական ակտի օրինական ուժի մեջ մտնելը։

Փաստաբան Մարինե Ֆարմանյանի գնահատմամբ՝ նման հայցն ի սկզբանե չպետք է քննվեր քաղաքացիական դատարանում, քանի որ հոգևորականին կարգալույծ անելու հարցը սովորական աշխատանքային հարաբերություն չէ։

Հիշեցնենք նաև, որ Մայր Աթոռն առանձին հայցեր է ներկայացրել՝ պահանջելով վերադարձնել Հովհաննավանքը և Ասատրյանի օգտագործմանը հանձնված բնակարանը։ Եկեղեցին պահանջում է, մասնավորապես, վերադարձնել վանքի բանալիները և արգելել նրա մուտքը Սուրբ Խորան, ավանդատուն և ատյան։ Հուլիսի 1-ին Վարչական դատարանն արդեն ոչ իրավաչափ էր ճանաչել Ոստիկանության անգործությունը՝ Ասատրյանին վանքի տարածքից հեռացնելու գործողություններ չկատարելու հարցում։

Անի Աբաղյան