Հայ ինքնության դեմ ծանր հարվածները պետք է կանգնեցվեն․ իր ծանրակշիռ դերը պետք է ունենա Հայոց Եկեղեցին․ Տիգրան Աբրահամյան
ԱԺ «Պատիվ ունեմ» խմբակցության պատգամավոր Տիգրան Աբրահամյանը գրում է․
«Օրեր առաջ «Նուբարաշեն» քրեակատարողական հիմնարկից բավականին հետաքրքիր և ստեղծված իրավիճակին համահունչ նախաձեռնությամբ հանդես եկավ ՀՀԿ փոխնախագահ Արմեն Աշոտյանը, որը համատարած արժեհամակարգային անկման պայմաններում կարևոր քննարկումների դաշտ է բացում:
Արմենն առաջարկում է 1988-ից առ այսօր Հայաստանի և Արցախի անկախության համար նահատակվածների սրբադասման գործընթաց սկսել:
Առաջարկի հիմնավորումները բազմաթիվ են` հանուն հայրենիքի ազատագրման ու պաշտպանության նահատակվելու վեհ գաղափարի ամրագրումից մինչև Հայաստանի ու Արցախի համար պայքարի կարևորության հաստատում:
Փաշինյանական թշնամական թեզերն այն մասին, թե մեր մարտիկները «հանուն ոչնչի են զոհվել», ոչ միայն քարոզչական մակարդակում պետք է հերքել ու ոչնչացնել, այլ մեր նահատակների անձնազոհությունը պետք է արժեվորել և բարձրացնել լրիվ այլ հարթություն:
Սա ենթադրում է ոչ միայն հասարակական, քաղաքական մակարդակում քննարկումների ծավալում, այլ վերջնարդյունքում` բոլոր փաստարկներով/հակափաստարկներով Ամենայն Հայոց Կաթողիկոսին ներկայացում:
Երկրում բոլոր ուղղություններով տեղի ունեցող զանգվածային անկումային գործընթացները, որոնք վառ արտահայտված են հատկապես ազգայինի ու հայ ինքնության դեմ ծանր հարվածներով, պետք է կանգնեցվեն և դրանում, անկասկած, իր ծանրակշիռ դերը պետք է ունենա Հայոց Եկեղեցին»:
