ԱՄՆ Սենատը տապալել է Թուրքիային 23 միլիարդ դոլար արժողությամբ F-16 կործանիչ-ռմբակոծիչների և արդիականացման սարքավորումների վաճառքը դադարեցնելու փորձերը. այս մասին հաղորդում է Reuters գործակալությունը։
ԱՄՆ նախագահ Ջո Բայդենի վարչակազմը կործանիչների վաճառքին հավանություն էր տվել այն բանից հետո, երբ Թուրքիան հաստատել է Շվեդիայի անդամակցությունը ՆԱՏՕ-ին:
Սենատում 79 սենատոր դեմ են քվեարկել հանրապետական սենատոր Ռենդ Փոլի կողմից ներկայացված օրինագծին, և միայն 13-ն են կողմ քվեարկել։
Քվեարկությունից առաջ Փոլը քննադատել է Թուրքիայի կառավարությանը և ասել, որ վաճառքի թույլտվությունը կխրախուսի նրա «վատ վարվելակերպը»:
Վաճառքի աջակիցներն էլ պնդել են, որ Վաշինգտոնի համար կարևոր է պահել ՆԱՏՕ-ի դաշնակցին տված խոստումը:
Բայդենի վարչակազմը Lockheed Martin ընկերության արտադրած 40 F-16-ներ և մոտ 80 արդիականացման սարքավորումների վաճառքը շարունակելու իր մտադրության մասին Կոնգրեսին պաշտոնապես տեղեկացրել էր հունվարի 26-ին՝ Անկարայի կողմից Շվեդիայի անդամակցությունը ՆԱՏՕ-ին լիովին վավերացնելու հաջորդ օրը։
Թուրքիան F-16-եր ձեռք բերելու համար ԱՄՆ-ին դիմել էր դեռ 2021 թ․ հոկտեմբերին։
