Մախսուդյանի որդուն մեղադրում են իր ոտքին բարձրացած ԵԿՄ մեքենայի դիմապակուն հարվածելու համար․ պաշտպան
Պահեստազորի գնդապետ Միհրան Մախսուդյանի որդուն՝ Վահագն Մախսուդյանին, մեղադրանք է առաջադրվել խմբի կազմով խուլիգանության կատարելու հոդվածով․ ABC media-ի հետ զրույցում ասել է նրա պաշտպան Հովհաննես Խուդոյանը։
«Խոսքը ապրիլի 21-ին ԵԿՄ-ի մեքենայի հետ կապված միջադեպի մասին է, երբ մեքենան փորձել է մխրճվել հավաքված մարդկանց մեջ, և դրա ընթացքը փորձել են կասեցնել, մի քանի անձինք հարվածներ են հասցրել մեքենային։ Կոնկրետ Մախսուդյանի արարքն այդ միջադեպում սահմանափակվում է ընդամենը մեկ անգամ մեքենայի դիմապակուն հարվածելով, և այն էլ այն բանից հետո, երբ այդ մեքենան բարձրացել է իր ոտքին։ Այդ վնասվածքն առ այսօր կա»,-ասել է Խուդոյանը։
Նա տեղեկացրել է նաև, որ մեքենայում եղած անձինք և՛ Մախսուդյանի, և՛ շրջապատի մարդկանց հասցեին հայհոյանքներ են հնչեցրել, ինչից նյարդայնանալով և ցավից դրդված՝ Մախսուդյանը ձեռքով հարվածել է դիմապակուն։
«Հիմա վարույթ իրականացնող մարմինը գնահատել է, որ այդ արարքում խմբի կազմում խուլիգանություն է տեսնում»,-ասել է Խուդոյանը։
