Հոսպիտալացված 19-ամյա զինվորին դաժան ծեծե՞լ են․ իրավապաշտպանն ահազանգում, ՊՆ-ն հերքում է տեղեկությունը
Իրավապաշտպան Ժաննա Ալեքսանյանն ահազանգել է բանակի հերթական միջադեպի մասին․ Facebook-ի իր էջում նա գրել է, որ Ջերմուկի զորամասերից մեկում 19-ամյա ժամկետային զինծառայող Ա․ Հ․-ի դաժան ծեծել են։ Ալեքսանյանը տեղեկացրել է, որ տղայի վիճակն այնքան ծանր է եղել, որ նրան ստիպված տեղափոխել են Կանազի հոսպիտալ՝ դեպքից 10-ն օր հետո միայն։
«Մայրը որդուն տեսել է անճանաչելի վիճակում, դեմքը դեֆորմացված, հալուցինացիաների մեջ։ Զինվորը բանակ էր զորակոչվել 6 ամիս առաջ, հոգեկան առողջական խնդիրներով։ Դեպքը տեղի է մոտ մեկ- երկու շաբաթ առաջ, սակայն քրեական գործ չկա հարուցված, և, կարծես, չեն էլ պատրաստվում հարուցել։ Մոր տեղեկություններով՝ ծեծի հեղինակը սպայական կազմից է»,- ընդգծել է իրավապաշտպանը՝ օմբուդսմենին հորդորելով արձագանքել դեպքին։
Պաշտպանության նախարարությունը հերքել է տղային ծեծելու տեղեկությունը, հաստատել՝ նրան հոսպիտալացնելու հանգամանքը։
«Զինվորական հոսպիտալ է ընդունվել առողջական այլ խնդրով։ Պատրաստ ենք Մարդու իրավունքների պաշտպանի գրասենյակի ներկայացուցիչներին ուղեկցել հոսպիտալ՝ տեղում իրականությանը ծանոթանալու նպատակով։
Զինծառայող Ա. Հ.-ն գտնվում է դիտարկման և հետազոտման փուլում, նրա առողջական վիճակը լավ է, և անհանգստացնող որևէ խնդիր չկա»,- ավելացրել են պատասխանատու գերատեսչությունից։
