ՀՀ-ն, Վրաստանը, Ղազախստանը և Ղրղզստանը զբաղեցրել են ամենաբարձր վարկանիշն ավտովթարների հետևանքով մահացությունների թվով. WPR

Ավտոմեքենաների անվտանգությունը մնում է գլխավոր խնդիրը Կովկասի և Կենտրոնական Ասիայի երկրների համար, քանի որ երկու տարածաշրջաններն ունեն երթևեկության հետ կապված մահացության ամենաբարձր մակարդակն աշխարհում: Կենտրոնական Ասիայի ճանապարհները, կարծես թե, ավելի վտանգավոր են դառնում։ Ղազախստանում 2024 թվականին ավտովթարների հետևանքով մահացության դեպքերն աճել են՝ կազմելով 2579, ինչը ամենաբարձր ցուցանիշն է վերջին տասնամյակում:

Տաջիկստանը ևս առնվազն 2005 թվականից ի վեր գրանցել է ավտովթարներից մահացությունների իր ամենաբարձր ընդհանուր թիվը 2024 թվականին՝ 552 դեպք: Մահացության մակարդակն ավելի ցածր է եղել Ուզբեկստանում և Ղրղզստանում, և երկուսն էլ վերջին տասնամյակում մահացությունների կրճատման համեստ բարելավումներ են գրանցել: Չնայած դրան, Ղրղզստանը 2024 թվականին գրանցել է ճանապարհատրանսպորտային պատահարների երկրորդ ամենաբարձր ցուցանիշը Կենտրոնական Ասիայում՝ մոտ 1000 դեպք մեկ միլիոն բնակչի հաշվով: Կովկասում իրավիճակն ավելի լավ չէ: Վրաստանը 2024 թվականին գրանցել է 444 մահվան դեպք՝ կապված ավտովթարների հետ, ինչը մի փոքր ավել է նախորդ տարվա համեմատ և համահունչ է վերջին հինգ տարիների թվերին: Հայաստանն ու Ադրբեջանը 2024 թվականին գրանցել են մահացությունների անկում: Այնուամենայնիվ,  Հայաստանի համար այսօր թվերն ավելի վատն են, քան մեկ տասնամյակ առաջ: Համաձայն World Population Review-ի կողմից կազմված տվյալների՝ Հայաստանը, Վրաստանը, Ղազախստանը և Ղրղզստանը զբաղեցրել են ամենաբարձր վարկանիշը աշխարհում՝ մեկ միլիոն բնակչի հաշվով ավտովթարների հետևանքով մահացությունների թվով:

Ղազախստանն ունի Կենտրոնական Ասիայի և Կովկասի երկրներից մահացության ամենաբարձր ցուցանիշը՝ 2024 թվականին մեկ միլիոն բնակչի հաշվով 129 դեպք: Ըստ դիտորդների՝ բազմաթիվ գործոններ նպաստում են շրջաններում ավտոմոբիլային մահացության բարձր մակարդակին, այդ թվում՝ վատ խնամված մեքենաները, ագրեսիվ և հարբած մեքենա վարելը, ինչպես նաև վատ գծանշված և պահպանված ճանապարհները:

Ֆինանսական վերլուծաբանները, մինչդեռ, ենթադրում են, որ ավտոմոբիլների հետ կապված մահերի տնտեսական ազդեցությունը զգալի է: Համաշխարհային բանկի գնահատականների համաձայն՝ Կենտրոնական Ասիայում ավտովթարներից մահացածների մոտավորապես երկու երրորդը 18-44 տարեկան տղամարդիկ են, որոնք հաճախ իրենց ընտանիքների եկամտի հիմնական աղբյուրն են: Շատ ընտանիքներ պետական նպաստների են դիմում՝ մասամբ փոխհատուցելու անսպասելի, ճանապարհային մահվան հետևանքով առաջացած տնտեսական վնասը: Ղազախստանում, օրինակ, կառավարությունը կերակրող չունեցող յուրաքանչյուր ընտանիքի համար տարեկան ծախսում է «մոտ 1645 ԱՄՆ դոլար»։