Թաիլանդի և Կամբոջայի ներկայացուցիչները համաձայնության են եկել՝ նվազեցնելու սահմանային լարվածությունը
Թաիլանդի և Կամբոջայի ներկայացուցիչները Կուալա Լումպուրում կայացած բանակցություններից հետո համաձայնության են եկել սահմանին լարվածությունը կարգավորելու վերաբերյալ. փոխանցում է TACC գործակալությունը՝ հղում անելով Թաիլանդի կառավարության հայտարարությանը:
«Ավարտվել է Թաիլանդի և Կամբոջայի միջև սահմանային իրավիճակի կարգավորման հանձնաժողովի նիստը։ Երկու կողմերն էլ համաձայնության են եկել հրադադարի պահպանման վերաբերյալ 13 կետից բաղկացած համաձայնագրի շուրջ, երկու երկրների ներկայացուցիչները ստորագրել են սահմանին լարվածությունը նվազեցնելուն և սահմանային գոտում խաղաղությունը վերականգնելուն ուղղված արձանագրությունը», – ասվում է Թաիլանդի կառավարության՝ X սոցցանցի էջում տարածած հայտարարության մեջ։
Կամբոջայի մամուլի գործակալության կողմից հրապարակված համաձայնագրի տեքստի համաձայն՝ կողմերը համաձայնել են պահպանել լիակատար հրադադար սահմանի ամբողջ երկարությամբ, զերծ մնալ ցանկացած տեսակի զենքի օգտագործումից և պահպանել զորքերի ներկայիս դասավորությունը՝ առանց դրանց թվաքանակը մեծացնելու։
Հիշեցնենք՝ մի քանի շաբաթ առաջ զինված բախումներ էին տեղի ունենում Թաիլանդի և Կամբոջայի զինված ուժերի միջև:
