ՀՀ-ում ընտրարշավն անսովոր միջազգային ուշադրություն է գրավել. միջազգային մամուլ

Նոր հարցումը կանխատեսում է, որ Նիկոլ Փաշինյանի կուսակցությունը կարող է խորհրդարանական մեծամասնություն ստանալ։ Եթե կայանալիք քվեարկությունը հաստատի հարցման կանխատեսումները, հայերը Փաշինյանին կտան վճռական մանդատ՝ ամրապնդելու Հարավային Կովկասի երկրի ռազմավարական վերադասավորումը դեպի արևմտամետ ուղի՝ այն դնելով Կրեմլի հետ բախման ուղու վրա․ գրում է Euronews-ը։

Ինչպես նշվում է, վերջին շաբաթներին Մոսկվան անընդհատ ուժեղացրել է իր ճնշումը Երևանի նկատմամբ։

IntelliNews-ը գրում է, որ ՀՀ-ում ընտրարշավն անսովոր միջազգային ուշադրություն է գրավել։ Մայիսի 27-ին ԱՄՆ նախագահ Դոնալդ Թրամփը հրապարակավ աջակցել է Փաշինյանին՝ նրան բնութագրելով որպես «մեծ ընկեր և առաջնորդ»։

Վաշինգտոնը խորացրել է համագործակցությունը Հայաստանի հետ՝ ԱՄՆ միջնորդությամբ Հայաստանի և Ադրբեջանի միջև նախաստորագրված խաղաղության համաձայնագրի հետ կապված նոր տնտեսական և անվտանգության նախաձեռնությունների միջոցով։

Չնայած քաղաքական լարվածությանը՝ Ռուսաստանը մնում է Հայաստանի ամենամեծ առևտրային գործընկերն ու էներգակիրների մատակարարը։ Վերջին շաբաթներին Մոսկվան սահմանափակումներ է մտցրել հայկական որոշ ապրանքների ներմուծման համար և զգուշացրել, որ Եվրոպայի հետ ավելի սերտ ինտեգրումը կարող է տնտեսական հետևանքներ ունենալ։