Հայ- թուրքական հարաբերություններում սահմանի՝ երրորդ երկրների քաղաքացիների համար բացելը ոչ մի խնդիր չի լուծում։ Դա փոքր առաջխաղացում է միայն․ ABC media-ի հետ զրույցում ասել է թուրքագետ Ռուբեն Սաֆրաստյանը։
«Այն սահմանի բացում չէ նշանակում։ Մեր վերջնական նպատակը այս բանակցային գործընթացում պետք է լինի սահմանը երկու երկրների միջև բացելը, ոչ թե երրորդ երկրների համար։ Եթե ստեղծվել է հանդիպումների նման ձևաչափ, ապա պետք է հարաբերությունները կարգավորվեն, դիվանագիտական հաստատություններ բացվեն, որը չի լինի։ Այդ փոքր քայլերն են լինելու միայն»,- ասաց թուրքագետը։
Երբ հայտարարվում է՝ երրորդ երկրների քաղաքացիների համար է բացվում սահմանը, քաղաքացիների շրջանում կասկած է առաջանում․ իսկ եթե այդ քաղաքացիները ադրբեջանցիները լինեն, և նրանք ռազմավարական նշանակության գործողություններ կատարե՞ն։ Սաֆրաստյանը պատասխանեց․
«Այդ առումով, իհարկե, վտանգավոր է։ Բայց եթե այդպես մտածենք, ադրբեջանցիները կարող են Հայաստան գալ հայ- վրացական, հայ- իրանական սահմանով։ Այստեղ շատ հստակ գործ ունեն անելու ՀՀ հատուկ ծառայությունները։ Հայաստանն է որոշում, թե ում թողնի իր երկիր, ում՝ ոչ։ Պետք է շատ հստակ ու զգուշ գործեն»,- ասաց Սաֆրաստյանը։
Դրական առումով՝ այս փոքր քայլից Հայաստանը ոչինչ չի շահի։ Սա պարզապես շատ փոքր քայլ է։ Հայ- թուրքական հարաբերությունները կարգավորելը իրականում երկարատև ձգվող գործընթաց է՝ դրական ու բացասական լուրջ խնդիրներով հղի։ Խելացի դիվանագիտությունն ու փորձն այդ հարցում մեծ անելիք ունի։
