Amazon-ի 2 ստորաբաժանումներում աշխատակիցները կզրկվեն իրենց պաշտոնական կոչումներից և կկոչվեն builders

Amazon-ի հարյուրավոր աշխատակիցներ կզրկվեն իրենց պաշտոնական աշխատանքային կոչումներից․ գրում է Reuters գործակալությունը։

Ընկերությունը շեշտում է, որ սա պատժամիջոց չէ՝ ցածր արդյունավետություն ցուցաբերած աշխատակիցների համար․ սա պարզապես ներքին փորձարկում է։

Այսպիսով, խելացի տան անվտանգության սարքավորումների արտադրությամբ զբաղվող Ring և Blink ստորաբաժանումների աշխատակիցները պարզապես կկոչվեն «մշակողներ» (builders), իսկ նրանց ղեկավարները՝ «մշակողների ղեկավարներ» (builder leads)։

«Մշակող» տերմինը Սիլիկոնյան հովտում դարձել է ընդհանուր անվանում այն աշխատակիցների համար, որոնք կարողանում են ինքնուրույն լուծել խնդիրներ՝ սովորաբար օգտագործելով արհեստական բանականություն այնպիսի նախագծերում, որոնք նախկինում պահանջում էին ինժեներների և նախագծերի ղեկավարների թիմեր։

Աշխատակիցներին ուղղված նամակում Amazon-ի ներկայացուցիչը գրել է․ «Մենք հանձնառու ենք սա դարձնել ապագայի կազմակերպություն, իսկ դա նշանակում է լինել թափանցիկ և բաց փոփոխությունների համար։ Մենք անցում ենք կատարում դեպի մեկ միասնական աշխատանքային ընտանիք՝ «մշակողներ»։ Որպես մշակողներ՝ մենք սահմանում և գնահատում ենք հաջողությունը մեկ չափանիշով՝ ինչպիսի ծավալի և նշանակության արժեք ես ստեղծում հաճախորդի համար»։