Եթե Փաշինյանն իշխանությունը մնա, հրաժարվելու ենք Անկախության հռչակագրից ու ուրանալու ենք Ցեղասպանությունը․ Սաղաթելյան
Ընդամենը 8-9 օր հետո ՀՀ քաղաքացին պետք է որոշի՝ ինչպես ու ինչպիսի երկրում է ուզում ապրել․ Վանաձորում նախընտրական քարոզարշվի ժամանակ ասաց «Հայաստան» դաշինքի պատգամավորության թեկնածու և խորհրդարանում համանուն խմբակցության պատգամավոր Իշխան Սաղաթելյանը։
«Ամբողջ խնդիրը հետևյալն է՝ ՀՀ քաղաքացիներն այս սատանաների ոհմակին, որ մահ, դժբախտություն ու կորուստ են բերել մեր երկրին ու ժողովրդին, հանդուրժելո՞ւ է, թո՞ւյլ է տալու, որ շարունակեն երկիրը կառավարել այսօրվա պես։ Թո՞ւյլ են տալու, որ երկրին ու իրենց տանեն նոր դժբախտությունների։ Կարծում եմ՝ ոչ»,- նշեց պատգամավորը։
Ըստ Սաղաթելյանի՝ իրավիճակն այժմ պարզից էլ պարզ է․ եթե այս իշխանությունը կարողանա վերարտադրվել, Ադրբեջանն իր զորքերը Հայաստանի տարածքից դուրս չի բերելու ու ՀՀ-ն նոր տարածքներ է զիջելու Ադրբեջանին։
«Եթե չարիքի այս իշխանությունը մնա, փոխվելու է մեր Սահամանդրությունը, հրաժարվելու ենք Անկախության հռչակագրից, ուրանալու ենք Ցեղասպանությունը։
Մենք ի՞նչ ենք ձեզ առաջարկում․ տվեք մեզ մանդատ ու հնարավորություն , կանգնենք մեր կողքին, մերժեք այս իշխանությանը, որպեսզի միասին կարողանանք կառուցել մրցունակ և անվտանգ Հայաստան»,- հավաքվածներին դիմելով՝ շեշտեց Սաղաթելյանը։
