Թրամփին դատի են տվել՝ իր գրառումներին վճարովի հասանելիության համար
The Intercept-ը և «Մամուլի ազատության հիմնադրամ» ոչ առևտրային կազմակերպությունը դատական հայց են ներկայացրել ԱՄՆ նախագահ Դոնալդ Թրամփի դեմ: Նրանք պահանջում են արգելափակել Truth API վճարովի ծառայությունը, որը վաղաժամ մուտք է ապահովում Թրամփի գրառումներին Truth Social սոցիալական ցանցում․ հաղորդում է CNBC-ն:
Հայցում նշվում է, որ Թրամփն ամսական 100․000 դոլար է գանձում իր սեփական գրառումներին, ինչպես նաև Սպիտակ տան, փոխնախագահ Ջ.Դ. Վենսի, ՀԴԲ տնօրեն Քեշ Պատելի և վարչակազմի այլ պաշտոնյաների գրառումներին վաղ հասանելիություն ապահովելու համար:
Միևնույն ժամանակ, Թրամփի և նրա վարչակազմի պաշտոնյաների գրառումները հաճախ ազդում են ֆինանսական շուկաների վրա, քանի որ դրանք վերաբերում են կառավարության քաղաքականությանը, ռազմական գործողություններին և այլ որոշումների:
Հայցվորները պնդում են, որ այս սխեման կոռումպացված բնույթ ունի և «հակասահմանադրական» է:
«Նախագահը ֆինանսական շահույթ է ստանում՝ շուկայական փոփոխությունների վրա ազդող կառավարական տեղեկատվություն տրամադրելով նրանց, ովքեր պատրաստ են և կարող են վճարել նրա անձնական ընկերությանը», – պնդում են նրանք:
