Թրամփի որոշումը կարող է անվստահություն առաջացնել պատվաստանյութերի նկատմամբ և դառնալ համաճարակի պատճառ ամբողջ աշխարհում․ Euronews

ԱՄՆ նախագահ Դոնալդ Թրամփը երկուշաբթի ստորագրել է գործադիր հրաման՝ առաջարկելով մանկական պատվաստումների համընդհանուր պլանային առաջարկություններով ընդգրկված հիվանդությունների թիվը 18-ից կրճատել մինչև 11: Եվրոպական դեղերի գործակալության հանրային առողջության սպառնալիքների բաժնի ղեկավար Մարկո Կավալերին Euronews-ին հայտնել է, որ որոշումները կարող են հանգեցնել պատվաստումների բացերի՝ բնակչությանը խոցելի դարձնելով բռնկումների նկատմամբ և խթանելով պատվաստանյութերի նկատմամբ անվստահությունը։

Նրա խոսքով՝ մանկական պլանային պատվաստումները բաց թողնելը կարող է «աղետալի» լինել։ Դա կարող է հանգեցնել «այն հիվանդությունների վերադարձին, որոնք մենք կարողացել ենք զսպել և վերացնել մեր երկրներից»։

Ավելին, դա կարող է խաթարել պատվաստանյութերի նկատմամբ վստահությունը հասարակության շրջանում:

«Նման որոշումները, ցավոք, կարող են շատ վնասակար լինել պատվաստանյութերի նկատմամբ վստահության առումով»,- զգուշացրել է Կավալերին։

Թրամփի հրամանագիրը COVID-19-ի, գրիպի, ռոտավիրուսային վարակի, մենինգոկոկային հիվանդության, RSV-ի և A և B հեպատիտների պատվաստումները հանում է համընդհանուր պլանային պատվաստումներից:

Հրամանը նաև խորհուրդ է տալիս կարմրուկի, խոզուկի և կարմրախտի պատվաստանյութը բաժանել 3 առանձին ներարկումների և դրանք կատարել առանձին այցերի ժամանակ:

Քայլը կատարվել է այն ժամանակ, երբ ԱՄՆ առողջապահության նախարար Ռոբերտ Ֆ. Քենեդի կրտսերը կասկածի տակ է դրել պատվաստանյութերի անվտանգությունը և առաջ է քաշել պատվաստանյութերն աուտիզմի հետ կապող պնդումներ՝ չնայած լայնածավալ գիտական ապացույցներին, որոնք չեն գտնում պատվաստանյութի և աուտիզմի միջև պատճառահետևանքային կապ։

Փոփոխությունները կարող են նաև ուժեղացնել պատվաստումների նկատմամբ դժկամությունը, հնարավոր է՝ բնակչությանն ավելի խոցելի դարձնելով կանխարգելելի հիվանդությունների բռնկումների նկատմամբ, որոնք վերացվել կամ վերահսկողության տակ են դրվել շատ երկրներում։

Եվրոպան արդեն ականատես է եղել պատվաստումների նվազման հետևանքներին։ ԱՀԿ տվյալներով՝ 6 երկրում՝ Հայաստանում, Ավստրիայում, Ադրբեջանում, Իսպանիայում, Միացյալ Թագավորությունում և Ուզբեկստանում, 2024 թվականին վերականգնվել է կարմրուկով վարակվելու դեպքերը։

Եվրահանձնաժողովի «Պատվաստանյութերի վստահության վիճակը» զեկույցում նշվում է, որ պատվաստանյութերի նկատմամբ ընդհանուր վստահությունը նվազել է լայն հանրության շրջանում 2020 թվականից ի վեր, մասնավորապես՝ Կենտրոնական և Արևելյան Եվրոպայի շատ երկրներում։ ԱՄՆ որոշումը կարող է ավելի խթանել այս միտումը։