Շատ ոգևորված եմ․ Ուիթքոֆը՝ Մոսկվայում և Կիևում բանակցությունների արդյունքների մասին
ԱՄՆ նախագահի հատուկ բանագնաց Սթիվ Ուիթքոֆը դրական է գնահատել Մոսկվայում և Կիևում անցկացված բանակցությունների արդյունքները՝ հայտարարելով, որ ամերիկյան կողմը «շատ ոգևորված է» քննարկումների ընթացքով։
Ուիթքոֆն ու ԱՄՆ նախագահի փեսա Ջարեդ Քուշները սեպտեմբերի 6-ին Կիևում հանդիպել են Ուկրաինայի նախագահ Վլադիմիր Զելենսկու հետ։ Սա Ուիթքոֆի և Քուշների առաջին այցն էր Կիև՝ խաղաղության բանակցությունների շրջանակում։
Մեկ օր առաջ նրանք ավելի քան երեք ժամ բանակցել էին Ռուսաստանի նախագահ Վլադիմիր Պուտինի հետ Կրեմլում։ Կրեմլի ներկայացուցիչ Յուրի Ուշակովը հանդիպումն անվանել էր օգտակար և կառուցողական, սակայն որևէ կոնկրետ պայմանավորվածության կամ էական առաջընթացի մասին չէր հաղորդվել։
Կիևում բանակցությունների ընթացքում քննարկվել են Ուկրաինայի անվտանգության և տնտեսական երաշխիքները, հակաօդային պաշտպանության միջոցների մատակարարումները, ինչպես նաև ձմռանը Ուկրաինային աջակցելու հարցերը։ Զելենսկու խոսքով՝ քննարկումները եղել են «շատ բովանդակալից»։
ԱՄՆ-ը փորձում է վերակենդանացնել Ռուսաստանի և Ուկրաինայի միջև խաղաղության գործընթացը, սակայն կողմերի միջև դեռևս պահպանվում են էական տարաձայնություններ։
