Զելենսկին կոչ է արել վերսկսել ԱՄՆ-Ռուսաստան-Ուկրաինա եռակողմ բանակցությունները

Ուկրաինայի նախագահ Վլադիմիր Զելենսկին ԱՄՆ նախագահի հատուկ բանագնացներ Սթիվ Ուիթքոֆի և Ջարեդ Քուշների հետ Կիևում կայացած բանակցություններից հետո կոչ է արել վերսկսել ԱՄՆ-ի, Ռուսաստանի և Ուկրաինայի միջև եռակողմ բանակցությունները։

Զելենսկին և Ուիթքոֆը բանակցությունները բնութագրել են որպես բովանդակալից։ Քննարկումների ընթացքում անդրադարձ է կատարվել Ուկրաինայի անվտանգության և տնտեսական երաշխիքներին, հակաօդային պաշտպանության միջոցների մատակարարմանը, ինչպես նաև Ուկրաինային ձմռանը ցուցաբերվելիք աջակցության փաթեթին։

Ուիթքոֆը նշել է, որ ԱՄՆ-ը ձգտում է հակամարտությունը լուծել դիվանագիտական ճանապարհով և պատրաստ է շարունակել գործընթացը այնքան ժամանակ, որքան անհրաժեշտ կլինի։

Զելենսկու խոսքով՝ տարածքային հարցերը կարող են լուծվել միայն առաջնորդների մակարդակով։ Նա նաև վերահաստատել է Ռուսաստանի նախագահ Վլադիմիր Պուտինի հետ հանդիպելու պատրաստակամությունը։
Կիևում ԱՄՆ բանագնացների հետ բանակցություններին զուգահեռ քննարկումներին միացել են նաև Մեծ Բրիտանիայի, Ֆրանսիայի և Գերմանիայի ներկայացուցիչները։

Ուիթքոֆի և Քուշների այցը Կիև տեղի է ունեցել Պուտինի հետ Մոսկվայում ավելի քան երեք ժամ տևած հանդիպումից մեկ օր անց։ Այդ հանդիպումից հետո նույնպես որևէ կոնկրետ համաձայնության կամ խաղաղության պայմանավորվածության մասին չէր հայտարարվել։