Հնդիկ զինվորականները հայ զինծառայողների համար անցկացնում են Akash զենիթահրթիռային համակարգի շահագործման մասնագիտացված ուսուցում
Հայաստանն ու Հնդկաստանը շարունակում են ամրապնդել իրենց արագ զարգացող պաշտպանական հարաբերությունները։ Այժմ հնդիկ զինվորականները հայկական զորքերի համար հենց ՀՀ տարածքում անցկացնում են Akash զենիթահրթիռային համակարգի շահագործման մասնագիտացված ուսուցում․ գրում է Indian Defence Times-ը։
Ըստ կայքի՝ այս քայլը կարևոր փուլ է գործընկերության հարցում, որը վերջին տարիներին զգալիորեն ընդլայնվել է և վկայում է երկու երկրների զինված ուժերի միջև աճող օպերատիվ փոխգործակցության մասին։
«Ռազմական տեխնիկայի վաճառքից և մատակարարումից բացի, վերապատրաստման (ուսուցման) բաղադրիչն ընդգծում է Հնդկաստանի հանձնառությունը՝ ապահովելու, որ հայկական ուժերն ի վիճակի լինեն արդյունավետորեն կիրառել և սպասարկել հակաօդային պաշտպանության այդ բարդ համակարգը»,-գրում է կայքը։
Հնդիկ ռազմական հրահանգիչներն օգնում են հայ օպերատորներին ծանոթանալ համակարգի հնարավորություններին, գործառնական ընթացակարգերին, սպասարկման պահանջներին և մարտավարական կիրառմանը:
Հնդկաստանի և Հայաստանի միջև աճող պաշտպանական հարաբերությունները տեղի են ունենում Հարավային Կովկասի տարածաշրջանում ավելի լայն աշխարհաքաղաքական փոփոխությունների ֆոնին: Հայաստանը ձգտում է դիվերսիֆիկացնել իր պաշտպանական գնումների աղբյուրները և նվազեցնել կախվածությունն ավանդական մատակարարներից՝ ստեղծելով հնարավորություններ Հնդկաստանի հետ ավելի խոր համագործակցության համար:
Akash համակարգը միջին հեռահարության շարժական զենիթահրթիռային համալիր է, որը նախատեսված է տարբեր օդային սպառնալիքներից, այդ թվում՝ ինքնաթիռներից, ուղղաթիռներից, անօդաչու թռչող սարքերից և թևավոր հրթիռներից պաշտպանվելու համար։
