Վրաստանի քաղաքացին մեղադրվում է ԱՄՆ-ում նեոնացիստական ծայրահեղական խմբավորում ստեղծելու և հրեա երեխաների զանգվածային սպանություններ պլանավորելու համար․ այս մասին տեղեկացնում է Associated Press-ը։
Նյու Յորքի Արևելյան շրջանի դատախազության և ԱՄՆ արդարադատության նախարարության տվյալներով՝ 21-ամյա Միխեիլ Չխիկվիշվիլին մտադրվել է Սանտա Կլաուսի հագուստով իր օգնականի միջոցով թունավոր կոնֆետ բաժանել Նյու Յորքի հրեա երեխաներին՝ այդպիսով «ստեղծելով տեռորի մթնոլորտ»։
Չխիկվիշվիլին ձերբակալվել է այն բանից հետո, երբ փորձել է հավաքագրել խմբի նոր անդամին, որը Հետաքննությունների դաշնային բյուրոյի աշխատակից է եղել։
Հետաքննությունը ենթադրում է, որ հենց Չխիկվիշվիլին է հայտնի որպես «հրամանատար մսագործ» և գլխավորում է «մարդասպան մոլագարների պաշտամունքը» ՝ «Նեոնացիստական աքսելերացիոնիստական գաղափարախոսություն» միջազգային ծայրահեղական խմբավորումը, որը քարոզում է բռնություն և բռնության գործողություններ ռասայական փոքրամասնությունների, հրեական համայնքի և այլ խմբերի դեմ:
Չխիկիշվիլին տարածել է մի մանիֆեստ, որը կոչվում էր «Ատողների ուղեցույց», որտեղ նա պնդում էր, որ ինքը «սպանում է սպիտակ ռասայի համար» և խրախուսում է մյուսներին անել նույնը: Ի թիվս այլ կոչերի, նա խրախուսում էր իր ընթերցողներին կրակոցներ իրականացնել դպրոցում և օգտագործել երեխաներին մահապարտ ահաբեկչություններ և այլ զանգվածային սպանություններ իրականացնելու համար, որոնք ուղղված են ռասայական փոքրամասնություններին», – ասվում է Արդարադատության նախարարության հայտարարության մեջ:
