Այժմ համաշխարհային ասպարեզում կլինեն հսկայական իշխանությամբ երկու ամերիկացիներ` քաղաքական ու հոգևոր ոլորտներում. CNN
Երբ նորընտիր Հռոմի պապը դուրս եկավ Սուրբ Պետրոսի հրապարակին նայող պատշգամբ, նա ցնցեց աշխարհն․ ընդունված է, որ կարդինալների կոնկլավը երբեք ամերիկացու չի ընտրի. գրել է CNN-ը։
Ինչպես նշվել է, Միացյալ Նահանգները հաճախ համարվում էր չափազանց հզոր՝ ռազմական, դիվանագիտական և նույնիսկ մշակութային առումով, որպեսզի կարողանար վերահսկել նաև աշխարհի ամենաազդեցիկ բարոյական իշխանության կենտրոններից մեկը՝ Հռոմի կաթոլիկ եկեղեցին և նրա հոտը, որը ներկայումս ԱՄՆ բնակչության թվաքանակից ավելի քան երեք անգամ մեծ է։
Այնուամենայնիվ, նախկին կարդինալ Ռոբերտ Պրևոստը, որին նրա ընկերները ճանաչում են որպես Բոբ, կատարեց մի սխրանք, որը շատ ամերիկացի հավատացյալներ կարծում էին, որ երբեք չեն տեսնի։
«Սակայն բոլոր ժամանակներից առավել այս պահին կա մի հետաքրքրաշարժ հարց. ինչո՞ւ կարդինալներն ընտրեցին ամերիկացու։ Միայն Սիքստինյան կապելլայի ներսում գտնվող ընտրողներն են լիովին հասկանում այն դինամիկան, որը հանգեցրել է նրան, որ Լեոն հաջորդեց հանգուցյալ Հռոմի պապ Ֆրանցիսկոսին կոնկլավի երկրորդ օրը։ Թվում է՝ անսովոր զուգադիպություն է, որ առաջին ամերիկացի Պապն ընտրվել է հենց այն պահին, երբ Միացյալ Նահանգներն իր նոր նախագահ Դոնալդ Թրամփի գլխավորությամբ շրջվում է բազմաթիվ արտաքին մոտեցումների, դաշինքների և նույնիսկ ներքին արժեքների դեմ», – գրել է գործակալությունը։
Պրևոստը տասնամյակներ շարունակ միսիոներ է եղել, իսկ Պերուում նա քաղաքացիություն է ստացել և ծառայել որպես եպիսկոպոս։ Նա խոսում է մի քանի լեզուներով և որպես Պապ՝ իր առաջին հրապարակային ելույթի ժամանակ ոչ մի հղում չի արել իր ամերիկյան ծագմանը, փոխարենը խոսել է իտալերեն և իսպաներեն։ Կարծես նոր Պապը բավականաչափ անջատ է իր ծննդավայրից, և նրան ոչ մի կերպ չի կարելի ընկալել որպես դրա քաղաքականության կամ իշխանության գործիք։
Այն ժամանակ, երբ ԱՄՆ վարչակազմը կրճատում է հիվանդներին տրամադրվող օգնությունը, օրինակ՝ Աֆրիկայում USAID-ի ծրագրերի դադարեցման միջոցով, Հռոմի կաթոլիկ եկեղեցու նոր առաջնորդն աղքատներին ծառայելը դարձրել է իր կոչումը։
«Մակերեսային կլիներ պնդել, որ Լեոյի ընտրությունը Թրամփի դեմ ուղղված հանդիմանանք է։ Սակայն անհնար է նաև անտեսել, որ Հռոմի կաթոլիկ եկեղեցին տիրապետել է բարձր քաղաքականության տեխնիկային Միացյալ Նահանգների անկախության նվաճումից դարեր առաջ։ Անկախ նրանից, թե ինչ դրդապատճառներ ունեն նրանք, ովքեր ընտրել են Հռոմի պապ Լեոյին, հինգշաբթի օրը Վատիկանում տեղի ունեցած իրադարձությունները հետաքրքիր իրավիճակ են ստեղծել։ Այժմ համաշխարհային ասպարեզում կլինեն երկու ամերիկացիներ, որոնք կունենան հսկայական իշխանություն՝ մեկը քաղաքականապես, մյուսը՝ հոգևորապես։ Ե՛վ Թրամփի, և՛ Հռոմի պապ Լեոյի միջև անուղղակի համեմատություններն ու հնարավոր անհամաձայնություններն անհնար կլինի անտեսել», նկատել է CNN-ը։
