Լավրովը Մոսկվայում կհանդիպի ԱՊՀ երկրների արտաքին գործերի նախարարների հետ

Ռուսաստանի ԱԳՆ ղեկավար Սերգեյ Լավրովը կմասնակցի Մոսկվայում կայանալիք ԱՊՀ արտաքին գործերի նախարարների խորհրդի նիստին, ինչպես նաև կհանդիպի Կենտրոնական Ասիայի երկրների դիվանագիտական առաքելությունների ղեկավարների հետ. գրում է ТАСС-ը։

Ինչպես ավելի վաղ հաղորդվել էր, 2026 թվականին կայանալիք ԱՊՀ արտաքին գործերի նախարարների խորհրդի առաջին նիստի ժամանակ Համագործակցության արտաքին գործերի նախարարությունների ղեկավարները «կամփոփեն 2025 թվականի արտաքին գործերի նախարարությունների միջև համագործակցության արդյունքները և կքննարկեն ինտեգրացիոն կապերի զարգացման հեռանկարներն ու հիմնական նպատակները, այդ թվում՝ կազմակերպությունում Թուրքմենստանի ներկայիս նախագահության և այս տարի նշվող ԱՊՀ 35-ամյակի առաջնահերթությունների իրականացման համատեքստում»։

Արտգործնախարարները մտքեր կփոխանակեն միջազգային և տարածաշրջանային արդիական հարցերի շուրջ։ Հանդիպումից հետո կընդունվեն մի շարք որոշումներ՝ ուղղված արտաքին քաղաքականության համակարգման, մշակութային, հումանիտար, իրավապահ և այլ ոլորտներում համագործակցության ամրապնդմանը։

Ռուսաստանի ԱԳՆ մամուլի խոսնակ Մարիա Զախարովայի խոսքով՝ հաստատված փաստաթղթերի մեծ մասը կներկայացվի ԱՊՀ պետությունների և կառավարությունների ղեկավարներին՝ հետագա հաստատման համար: