«Հույսը Սիրիայում կախված է թելից». ԵՄ-ը խոստանում է ավելի շատ օգնություն ցուցաբերել երկրին՝ չնայած բռնությանը
Եվրամիության երկրները կշարունակեն աջակցել Սիրիայի նոր ղեկավարությանը և՛ ֆինանսական օգնության, և՛ պատժամիջոցների չեղարկման միջոցով՝ չնայած «աղանդավորական բռնության աճին», որը սպառնում է երկրի կայունությանը․ Politico-ի փոխանցմամբ՝ այս մասին հայտարարել են դաշինքի արտաքին գործերի նախարարները:
Գերմանիան, որը գլխավորել է լսումները, խոստացել է 300 միլիոն եվրո աջակցություն Սիրիայի բնակչությանը սննդի, առողջության և այլ կարևոր ծառայությունների համար, քանի որ ԵՄ բարձրաստիճան դիվանագետ Կայա Կալլասը հայտարարել է, որ դաշինքը կշարունակի չեղարկել Սիրիայի դեմ պատժամիջոցները:
«Որպես եվրոպացիներ՝ մենք միասին հանդես ենք գալիս հանուն Սիրիայի ժողովրդի, հանուն ազատ և խաղաղ Սիրիայի», – Բրյուսելում Սիրիայի համար ամենամյա դոնորների համաժողովից առաջ ավելացրել է Գերմանիայի արտաքին գործերի նախարար Աննալենա Բերբոքը:
Կալլասը պնդել է, որ դաշինքը պետք է կրկնապատկի իր աջակցությունը Սիրիային՝ միաժամանակ զգուշավորություն ցուցաբերելով․
«Բռնության աճը իսկապես մտահոգիչ է», – նշել է նա՝ հավելելով, որ դա ցույց է տալիս, որ Սիրիայում «հույսն իսկապես թելից կախված է: Սա ցույց է տալիս, որ մենք պետք է ավելին անենք, որպեսզի իսկապես ցույց տանք, որ Սիրիան գնում է ճիշտ ուղղությամբ»։
ԵՄ բարձրաստիճան պաշտոնյաները հույս են հայտնել, որ հավելյալ ֆինանսավորումը կօգնի Սիրիային «շրջել» 14 տարվա քաղաքացիական պատերազմի էջը՝ մտավախությունների ֆոնին, որ Միացյալ Նահանգներից միջազգային օգնության սառեցումը կարող է վատթարացնել իրավիճակը տեղում:
ԵՄ-ն գլխավորել է Սիրիայի հետ դիվանագիտական կապերը վերականգնելու ջանքերը վերջին ամիսներին, այդ թվում՝ վերացնելով ի սկզբանե Ասադի ռեժիմի դեմ սահմանված պատժամիջոցները:
