Այսօր ԿԽՄԿ միջոցով բուժման նպատակով ՀՀ բուժհաստատություններ տեղափոխվող հիվանդներից Ադրբեջանի կողմից արգելանքի է վերցվել ԱՀ 68-ամյա մի քաղաքացի և անցակետից տեղափոխվել այլ վայր. տեղեկացրել էր Արցախի պետնախարար Գուրգեն Ներսիսյանը։ Արցախի Մարդու իրավունքների պաշտպան Գեղամ Ստեփանյանն էլ նշել էր, որ ԱՀ քաղաքացի Վագիֆ Խաչատրյանն առևանգվել է Ադրբեջանի սահմանապահ ծառայության ներկայացուցիչների կողմից և տեղափոխվել անհայտ ուղղությամբ։
ABC Media-ի հետ զրույցում ԿԽՄԿ-ի հաղորդակցության ծրագրերի պատասխանատու Զառա Ամատունին նշեց, որ հարցը քննարկում են կողմերի հետ, շատ մանրամասներ հայտնել չի կարող։
«Մեր կազմակերպությունը իր մարդասիրական բոլոր գործողությունները Լաչինում իրականացնելիս նախապես համաձայնեցնում է իր տեղաշարժը՝ կողմերում որոշում կայացնողների հետ։ Սա ներառում է նաև անձանց տվյալների փոխանցումն, ու դրանից հետո միայն իրականացվում է աշխատանքը, այսինքն մարդկանց ապահով տեղափոխումը այն ուղղությամբ, որով տեղաշարժվում են։ Ինչ վերաբերում է կոնկրետ այս հարցին, բնականաբար ցանկացած խնդիր տարբեր տեսանկյունից քննարկում ենք, բայց դրա մասին խոսում ենք անմիջապես կողմի հետ և հիմնականում դա տեղի է ունենում կոնֆիդենցյալ երկխոսության միջոցով։ Այս պահի դրությամբ ավելին ասել չեմ կարող դեպքի կապակցությամբ»,-ասաց Ամատունին։
Հարցին, թե ինչ աշխատանքներ են տանում 68-ամյա քաղաքացուն հետ վերադարձնելու համար, Ամատունին պատասխանեց` դա ևս հրապարակման ենթակա չէ։
